Bölgədə öz iqtisadi gücü və inkişafı ilə lider olan Azərbaycan dövləti mütəmadi olaraq qonşu dövlətlərə gərəyi olan dəstəyi göstərə bilir. Pandemiya dövründə də Azərbaycan bu missiyasına sadiq qalmaqdadır.
Bu gün koronavirus pandemiyasından böyük əziyyət çəkən, fövqəladə vəziyyət rejimində olan Gürcüstana hazırda ən böyük dəstək göstərən ölkə Azərbaycandır. Bunu son günlər Gürcüstan rəsmiləri də dilə gətirir və dəstəyə görə Azərbaycan dövlətinə təşəkkür edirlər.
Azərbaycan iqtisadiyyatının inkişafı nəticəsində ölkəmizdə sənaye də inkişaf edib. Artıq Azərbaycan müxtəlif məhsullar istehsal edərək onu həm yerli, həm də qonşu ölkələrin bazarlarına çıxarmağa müvəffəq olub. Azərbaycanda istehsal olunan tənzif yüksək keyfiyyətinə görə maska istehsalında istifadə edilir.
Artıq Gürcüstanda tibbi maskalar Azərbaycandan alınan tənzifdən istehsal olunur. Gürcüstanın İqtisadiyyat və dayanıqlı inkişaf naziri Natia Turnava bildirib ki, Azərbaycanda bir müəssisə xüsusi olaraq Gürcüstan üçün tənzif istehsal edir.
“Gürcüstanda tibbi maska istehsalı üçün lazım olan xammalın alınmasında göstərdiyi dəstəyə görə Azərbaycan hökumətinə təşəkkür edirəm” - deyə bildirən nazir Azərbaycanın Gürcüstanın strateji tərəfdaşı olduğunu deyib. “Məhz Azərbaycandan alınan tənziflə biz Gürcüstanda tibbi maskaların ilk partiyasını istehsal etdik”.
O vurğulayıb ki, Gürcüstanın tənziflə təmin olunmasında bu ölkənin Azərbaycandakı səfirliyi və əməkdaşları böyük səylər göstərib. Həmçinin, Gürcüstanın İqtisadiyyat və Dayanıqlı İnkişaf Nazirliyindən bildirilib ki, hazırda ölkədə 8 müəssisədə tibbi maska tikilir.
“Azərbaycan qonşu ölkələrə bütün məsələlərdə dəstək göstərir”
“Azad İstehlakçılar” Birliyinin rəhbəri Eyyub Hüseynov bizimlə söhbətində bildirdi ki, Azərbaycanın regionda iqtisadi cəhətdən güclü dövlət olmasının qonşu ölkələrə də böyük faydası dəyir. E.Hüseynov vurğuladı ki, Azərbaycan həmişə qonşu ölkələrə dəstək göstərir. “Azərbaycanın istehsal etdiyi məhsullara bölgədə tələbatın artması çox müsbət haldır. Bu həm də Azərbaycan istehsalçıları və Gürcüstan istehlakçıları üçün çox əhəmiyyətli məsələdir. Pandemiya dövründə Azərbaycanda istehsal edilən tənzifə Gürcüstanda tələbatın olması və bu ölkədə ilk partiya qoruyucu maskaların Azərbaycan tənzifindən istehsal edilməsi çox müsbət göstəricidir. Bu gün Azərbaycan bölgədə öz iqtisadi gücü ilə liderdir və o, Gürcüstana da daimi dəstək göstərir”.
Azərbaycanın bölgədə daim balansı qoruduğunu deyən E.Hüseynovun sözlərinə görə, dar gündə dövlətimiz ehtiyacı olan ölkələrin köməyinə yetir. Bu gün bölgəmizdə pandemiya ilə əlaqədar bu virusun qarşısının alınmasında qonşu dövlətlərin də həmrəylik göstərməsi vacibdir. “Azərbaycan qonşu ölkələrə bütün məsələlərdə dəstək göstərir, eyni zamanda da bu məsələdə. Cənab Prezidentin göstərişi ilə açılan yeni maska fabrikinin artıq məhsulları bazara çıxıb. Hesab edirəm ki, bu məhsullar tezliklə başqa ölkələrə də ixrac ediləcək. Bununla Azərbaycan hökuməti də, Azərbaycan istehsalçıları da fəxr edə bilərlər” - deyə E.Hüseynov vurğuladı.
İradə SARIYEVA
