“Biz makroiqtisadi vəziyyəti qorumalıyıq. Eyni zamanda, banklar indiki şəraitdə biznesə daha böyük dəstək verməlidirlər. Mən çox şadam ki, artıq biznes kreditlərinin faizi artır, amma istehlak kreditlərinin faizi düşür. Bu, hesab edirəm ki, çox yaxşı tendensiyadır və bu, saxlanmalıdır”. Bunu Prezident İlham Əliyev 2020-ci ilin birinci rübünün sosial-iqtisadi yekunlarına həsr olunan müşavirədə çıxışında deyib.
Ölkə başçısının sözlərinə görə, özünüməşğulluq proqramına çox böyük tələbat var: “Biz nəzərdə tuturduq ki, dövlət xəttilə on min insana vasitələri təqdim edək. İndi Dünya Bankı da buna qoşuldu. Onlar tərəfindən də vasitələr veriləcək, bizim banklar da verəcək. Çünki tələbat daha çoxdur. Təqribən 40-50 min tələb, yəni sifariş var. Ona görə xüsusilə indiki şəraitdə mikrobiznesin inkişafı, - indi kənd təsərrüfatında da bu sahədə işlər nəzərdə tutulur, - mütləq aparılmalıdır ki, biz biznesi qoruyaq, onlara dəstək verək və razıyam ki, artıq normal həyata qayıtmaq üçün hazırlıq işlərimizi aparmalıyıq.
Ona görə mən, bütövlükdə, bank sektorunda və makroiqtisadi sahədə görülmüş işləri müsbət qiymətləndirirəm, belə də davam edin. Bilirəm ki, siz gündəlik formatda hər şeyə monitorinq aparırsınız. Hesab edirəm ki, faiz dərəcələrinin sabit saxlanması da çox müsbət addımdır, o qədər də asan məsələ deyil”.
Biznesin aktivliyini artırmaq üçün banklar fəal olmalıdırlar. Bu, birinci növbədə, sahibkarlara sərfəli şərtlərlə kreditlərin verilməsindən keçir. Yalnız bu yolla iqtisadi fəallığı yüksəltmək olar.
“...ölkədə qeyri-neft sektoru sürətlə inkişaf edəcək”
Məsələyə münasibət bildirən ekspert Rəsul Cahangirlinin sözlərinə görə, indiki şəraitdə banklar biznes kreditlərinə önəm verməlidirlər: “Zaman-zaman banklar əsasən fiziki şəxslərə istehlak kreditlərinin verilməsinə önəm veriblər. Düzdür, banklar kommersiya qurumlarıdır və müxtəlif kredit məhsulları təklif edə bilərlər. İstehlak kreditləri də bunlardan biridir. Ancaq banklar ölkədəki biznesin inkişafını da nəzərə almalıdırlar. Biznes kreditləşməsi ölkə iqtisadiyyatı üçün olduqca vacibdir və daim nəzarətdə saxlanmalıdır. Bu ilin əvvəlində ölkə iqtisadiyyatı üzrə bəzi biznes sahələrinin kreditləşməsində yüksək artım tempi müşahidə edilmirdi. Ancaq sonrakı aylarda bu dəyişməyə başladı. Xüsusilə prioritet hesab edilən kənd təsərrüfatı, emal, sənaye və istehsal istiqamətləri üzrə kreditləşmədə artım müşahidə olunur. Əvvəlki illərə baxanda biznes kreditlərində faizlər bir qədər düşüb, amma bu yetərli deyil. Banklar daha uyğun faizlərlə biznes kreditləri təklif etməlidirlər ki, sahibkarlar bunda maraqlı olsunlar. O zaman ölkədə qeyri-neft sektoru sürətlə inkişaf edəcək”.
Vidadi ORDAHALLI
