Məlum olduğu kimi, Azərbaycan Mərkəzi Bankının statistik hesabatı yayılıb. Sözügedən hesabatda 2020-ci ilin fevral ayının sonunda ölkədə bütün bank əmanətlərinin 10,34 faizinin bölgələrin payına düşdüyü qeyd edilir. Bu onu göstərir ki, Azərbaycanın bölgələrində bank əmanətlərinin həcmi artıb.
2020-ci il fevral ayının sonuna Azərbaycanın bölgələrində sakinlərin bank əmanətlərinin həcmi 898,7 milyon manat təşkil edib ki, bu da 2019-cu ilin eyni dövrü ilə müqayisədə 215.9 milyon manat və ya 31.6 faiz çoxdur.
Hesabat dövründə ölkənin bölgələrindəki bütün əmanətlərin 84,6 faizi (760,6 milyon manat) milli valyutada əmanətlərin payına düşüb. Fevral ayının sonuna olan məlumata görə, Bakıdakı ümumi əmanətlər 7,8 milyard manat təşkil edib ki, bunun da 3,36 milyardı milli valyutadadır.
2019-cu ilin dekabr ayı üçün ölkədə orta illik əmanət dərəcəsi 3,7 faiz, Bakıda 3,6 faiz təşkil edib.
Bölgələrdə əmanətlərin 31 faiz artımı nə ilə bağlıdır?
“Banklar son zamanlar daha çox regionlarla işləməyə başlayıblar”
Tanınmış iqtisadçı-ekspert Ruslan Atakişiyev bizimlə söhbətində bildirdi ki, son illər banklar bölgələrdə işləməyə daha çox meyl edirlər. “Qeyd edək ki, banklar son zamanlar daha çox regionlarla işləməyə başlayıblar. O cümlədən də yerli müştəriləri cəlb etmək baxımından banklar işlər görürlər. Digər tərəfdən də əlverişli üsullarla regionlardakı əmanətçiləri cəlb etmək üçün şərtlər qoyurlar. Hesab edirik ki, ümumiyyətlə, Azərbaycan manatı ilə qoyulan əmanətlərin sığortalanmasının ilin sonuna qədər davam etdirilməsi bu sahədə olan təşviq məsələlərindən biridir”.
R.Atakişiyev hesab edir ki, bu gün bankların bölgələrdən müştəri cəlb etməsi üçün həyata keçirdiyi mexanizmlər regionlarda əmanətçilərin banklara daha çox əmanət qoymasına səbəb olub. “Bankların bölgələrdəki əmanətçilərə əlverişli şərtlər təqdim etməsi və Azərbaycan manatı ilə qoyulan əmanətlərin ilin sonuna qədər sığortalanmasının davam etdirilməsi nəticəsində bölgələrdə əmanətlərin fazi bu dərəcədə artıb” - deyə R.Atakişiyev bildirdi.
İradə SARIYEVA
