Dünya Bankı COVID-19-la mübarizə" adlı hesabat açıqlayıb. Hesabat Avropa və Mərkəzi Asiya ölkələrində virusöncəki və hazırkı iqtisadi durum analiz edilib. Azərbaycanla bağlı hissədə müsbət məqamlar yer alıb. Qeyd olunub ki, hazırkı şəraitdə ÜDM-nin 100%-i ətrafında valyuta ehtiyatlarının olması, aşağı xarici borc ölkənin əsas üstünlüyüdür.
Bank ekspertləri hesab edirlər ki, virusun yaratdığı böhrandan ən ağır zərbə ən kasıb 40%-lik (ən yoxsul 1 və 2-ci kvintil qruplar) ev təsərrüfatlarına dəyəcək.
Hesabatda Azərbaycanla bağlı detallardan biri məzənnənin inflyasiya ötürücülüyü ilə bağlı (exchange rate pass-through) hesablamadır. Sənəd müəlliflərinə görə, Azərbaycan iqtisadiyyatı məzənnənin inflyasiya ötürücülüyünə son dərəcə həssasdır.
Bununla belə, DB-nin yeni proqnozuna əsasən, Azərbaycanda gələn il xidmət sektoru 4,1%, 2022-ci ildə isə 5,6% artacaq. Bu il isə sözügedən sektor COVID-19 virusunun pandemiyasının yaratdığı vəziyyətlə bağlı cəmi 0,1% artacaq. Dünya Bankının mütəxəssislərinin fikrincə, turizm sektorunda aktivliyin azalması, virusla bağlı məhdudiyyətlər bu sahəyə zərbə vuracaq.
Maraqlıdır, DB-nin sözügedən hesabatında Azərbaycanla bağlı 2 mühüm məqamın yer almasını ekspertlər necə dəyərləndirirlər?
“Valyuta ehtiyatları əlimizdə olan imkanlardan daha səmərəli istifadə etməyə və lazım gəldikdə problemlə daha uzun müddət keyfiyyətli mübarizə aparmağa şərait yaradır”
Məsələyə münasibət bildirən iqtisadçı-ekspert Fuad İbrahimov buna bir neçə aspektdən müsbət yanaşdı: “Məlum olduğu kimi, hazırkı dövrdə bütün dünya ölkələri koronavirus pandemiyası ilə mübarizə aparır. Bir sıra ölkələr çətin vəziyyətlə üzləşiblər. Söhbət əsasən iqtisadi çətinliklərdən gedir. Belə vəziyyətdə, şübhəsiz ki, böyük valyuta ehtiyatları, aşağı xarici borc Azərbaycanın üstünlüyüdür. Bu, indiki vəziyyətdə ölkə iqtisadiyyatının dayanıqlığı, möhkəmliyi barədə əminlik yaradır. İqtisadi vəziyyəti stabilləşdirən, o cümlədən, sosialyönümlü layihələrin icra mexanizmini təmin edən faktorların olması müsbət göstəricidir. Bu, əlimizdə olan imkanlardan daha səmərəli istifadə etməyə və lazım gəldikdə problemlə daha uzun müddət keyfiyyətli mübarizə aparmağa şərait yaradır. Hər iki göstərici bizim bu məsələdə beynəlxalq qurumların timsalında etibarımızı, digər tərəfdən, iqtisadi baxımdan dayanıqlığımızı təmin edəcək. Bununla belə, arzu edirəm ki, qısa zaman ərzində bu problem aradan qaldırılsın və bizim növbəti dəfə bununla sınağa çəkilməyimiz gündəmdə olmasın”.
Vidadi ORDAHALLI
