Xəbər verildiyi kimi, Prezidenti İlham Əliyevin “Koronavirus pandemiyasının və bundan irəli gələrək dünya enerji və səhm bazarlarında baş verən kəskin dalğalanmaların Azərbaycan Respublikasının iqtisadiyyatına, makroiqtisadi sabitliyə, ölkədə məşğulluq məsələlərinə və sahibkarlıq subyektlərinə mənfi təsirinin azaldılması ilə bağlı bir sıra tədbirlər haqqında” Sərəncamına əsasən, iqtisadiyyatın müxtəlif sahələrinə, o cümlədən, sahibkarlığa dövlət dəstəyinin göstərilməsi ilə bağlı proqramlar hazırlanıb.
İqtisadiyyat Nazirliyi bu proqramların əsas istiqamətləri, əhatə dairəsi, iqtisadi artıma və sahibkarlığa əsas dəstək alətlərini özündə ehtiva edən baza sənədini ictimaiyyətə təqdim edib. Məlum olub ki, karantin rejiminin tətbiqi, iqtisadi fəallığın məhdudlaşdırılması ilə bağlı qərarların qəbul olunması zamanı hökumət sahibkarlara və müəssisələrə müraciət edərək iş yerlərini ixtisar etməməyə və işçilərin əməkhaqlarını ödəməyə çağırış edib. Hazırlanmış dövlət dəstəyi mexanizmi bu çağırışlara əməl edən, iş yerlərini və əməkhaqlarını qoruyub saxlamış sahibkarlara şamil ediləcək. Yəni işini şəffaf quran, işçilərlə əmək müqavilələri bağlayan sahibkarlar dövlət dəstəyi proqramlarından daha çox faydalanacaqlar. Bu həm də dürüst sahibkarlığın inkişafında tarixi mərhələ aça bilər.
“Sahibkarlıq subyektlərinin bu dəstəkdən faydalanması orada çalışan insanların sosial durumuna müsbət təsir edəcək”
Sözügedən məsələ ilə bağlı fikirlərini baki-xeber.com-la bölüşən millət vəkili Aydın Hüseynovun fikrincə, bu cür yanaşma tamamilə doğru münasibətdir: “Çünki burada sosial məsuliyyət prinsiplərindən çıxış edən sahibkarlardan söhbət gedir. Hansı ki, ağır vəziyyətdə işçilərini ixtisar etmir, onların məvaciblərini kəsmir. Bu bir daha onu göstərir ki, sahibkar nə qədər işlərini dürüst qurursa, nə qədər qanunlara əməl edirsə, o zaman bu imkanlardan faydalanacaq. Sahibkarlar, bütövlükdə, ölkə iqtisadiyyatının bir tərkib hissəsi olaraq bu amilə xüsusi diqqət etməlidirlər. Belə prinsiplərlə çalışan dürüst sahibkarlar hər zaman dövlət tərəfindən dəstəklənəcəklər. Onlara yardım və diqqət göstəriləcək. Hesab edirəm ki, məhz bu cür fəaliyyət göstərən sahibkarlıq subyektləri digərləri üçün də örnək olacaqlar. Sadalanan öhdəliklərə əməl edən sahibkarlara hər zaman dəstək olmaq lazımdır. Çünki sözügedən sahələrdə çalışan çoxsaylı insan var. Sahibkarlıq subyektlərinin bu dəstəkdən faydalanması orada çalışan insanların sosial durumuna müsbət təsir edəcək”.
Vidadi ORDAHALLI
