Təxminən 80 ölkə koronavirus pandemiyası səbəbindən Beynəlxalq Valyuta Fondundan (BVF) maliyyə dəstəyi istəyib. Bu haqda BVF-nun rəhbəri Kristalina Georgieva məlumat verib. Fond rəhbərinin sözlərinə görə, Qırğızıstanın tələbi artıq təsdiqlənib və ondan əlavə daha 80-ə yaxın ölkə BVF-yə müraciət göndərib.
Qeyd edildiyi kimi, müraciətlərə yaxın vaxtlarda baxılacaq. BVF-nun nümayəndəsi bildirib ki, müraciət edən ölkələrin əksəriyyəti iqtisadiyyatı inkişaf etməkdə olanlardır. Ümumilikdə bu ölkələr təcili maliyyə yardımı olaraq təxminən 20 milyard dollar istəyiblər. Ukrayna prezidenti Vladimir Zelenski BVF-dən 2 milyard dollar istəyib. Ölkə liderinin sözlərinə görə, əks təqdirdə Ukraynanı tənəzzül gözləyir. Ümumdünya Səhiyyə Təşkilatının verdiyi məlumata görə, bu günə kimi dünyada koronavirusa 836 min nəfər yoluxub, onlardan 40 mindən çox insan dünyasını dəyişib.
Göründüyü kimi, Azərbaycanın adı yardım istəyən 80 ölkənin arasında yoxdur. Ölkəmizin başını uca edən bu amil nə ilə bağlıdır? Qeyd edə bilərik ki, Azərbaycan nəinki hansısa qurumdan bu vəziyyətlə bağlı yardım istəyib, əksinə, bir çox ölkələrə və qurumlara öz yardım əlini uzadıb. Azərbaycan Respublikası və Ümumdünya Səhiyyə Təşkilatı (ÜST) arasında uzunmüddətli səmərəli əməkdaşlıq münasibətləri mövcuddur. Azərbaycan Hökuməti dünyada koronavirus infeksiyasının yayılması risqinin qarşısının alınması istiqamətində beynəlxalq birliyin səylərinə töhfə məqsədilə ÜST-nin “Strateji Hazırlıq və Cavab Planı” çərçivəsində “COVID-19 müraciəti” adlı Fonduna 5 milyon ABŞ dolları məbləğində könüllü maliyyə yardımının verilməsi barədə qərar qəbul edib və onu köçürüb. Bununla yanaşı, Azərbaycan pandemiyanın ilk yayıldığı Çinə də yardım əlini uzadıb. Sumqayıt şəhər İcra Hakimiyyəti tərəfindən dostluq və əməkdaşlıq əlaqələri olan Çin Xalq Respublikasının Mienyan şəhərinə tibbi ləvazimatlar göndərib. Mienyana 100 min ədəd bone, 40 min ədəd maska, 100 min ədəd steril əlcək, 100 min ml spirt, 100 min ədəd baxil, 5 kiloqram xloramin (toz), 1850 həb xloramin göndərilib. Azərbaycan hökuməti tərəfindən humanitar əsaslarla İran İslam Respublikasına isə 5 milyon ABŞ dolları məbləğində maliyyə yardımının göstərilməsi barədə qərar qəbul edilib. Nazirlər Kabineti tərəfindən 2020-ci ilin dövlət büdcəsində nəzərdə tutulmuş Ehtiyat Fondundan bu vəsaitin ayrılmasına dair Sərəncam qəbul olunub. Bununla yanaşı, Azərbaycan pandemiya zamanı yaranmış vəziyyətlə bağlı geniş sosial yardım paketləri də qəbul edib. Həmin paket bir sıra sahələri əhatə edir və büdcədən bu məqəsdlə 2,5 milyard vəsait ayrılıb. Bütün bunlar onu deməyə əsas verir ki, Azərbaycan zamanında yaxşı qiymətə sata bildiyi neftdən və digər sahələrdən əldə etdiyi gəlirlərə ciddi nəzarət edib. Özü üçün məhz belə vəziyyətlərlə bağlı ehtiyat toplayıb. Azərbaycanın büdcəsi və ehtiyat fondu imkan verir ki, pandemiyadan doğan xərcləri bundan sonra da qarşılaya bilsin.
Məhəmmədəli QƏRİBLİ
