Azərbaycanda biznesə və iqtisadiyyata dəstək üçün nəzərdə tutulan tədbirlərdən biri kimi ipoteka kreditlərinə də dəstək proqramı nəzərdə tutulur. Bu barədə İqtisadiyyat naziri Mikayıl Cabbarov bildirib.
Nazir görülən tədbirlər çərçivəsində ölkədə ipoteka kreditləşməsinə dəstək veriləcəyini qeyd edib: “Bilirsiniz ki, ölkəmizdə İpoteka və Kredit Zəmanət Fondu fəaliyyət göstərir. İpoteka ona görə vacibdir ki, bizim fəaliyyətimizin əsas hədəflərindən və sərəncamda verilən tapşırıqlarda olduğu kimi, yalnız qısamüddətli təsiri qiymətləndirmə və qısamüddətli addımların atılması deyil, həmçinin, ortamüddətli dövrdə ölkənin yeni iqtisadi çərçivəsinin və yeni iqtisadi şəraitdə təkliflərin hazırlanmasından ibarətdir”.
M. Cabbarov onu da qeyd edib ki, koronavirus pandemiyasından sonrakı dövrdə tikinti sektoru iqtisadiyyatın sürətini yenidən yığması üçün aparıcı sektorlarından biri olacaq: “Həm əməktutumluluğuna, həm də tikinti sektoruna zəruri olan böyük həcmdə və sayda xammal və materialların ölkəmizdə istehsal olunması, həm də bir qayda olaraq, tikinti sektorunun «multiplikator» effekti var, vətəndaşlar yeni mənzillərə sahib olanda bu onların rifahı deməkdir. Ona görə də bu sahənin canlanması bizim üçün çox vacibdir”.
Koronavirus pandemiyası əksər iqtisadi sahələrə bu və ya digər dərəcədə mənfi təsir edir. Sözügedən təsirləri azaltmaq üçün müxtəlif paketlərin tətbiqi gündəmdədir. Bu baxımdan koronavirusun mənfi təsirləri şəraitində dövlətin ipoteka kreditləri prosesinə dəstək verməsi hansı müsbət nəticələr verə bilər?
“Bunun nəticəsində işsizlik azalar, əhalinin xeyli hissəsinin sosial vəziyyəti yaxşılaşar”
Məsələyə münasibət bildirən ekspert Rəsul Cahangirlinin sözlərinə görə, ipoteka kreditləşməsinə dövlət dəstəyinin verilməsi çox önəmli sosial nəticələrə yol açar: “Adətən, iqtisadi böhranlar zamanı bir sıra böyük layihələr həyata keçirilir. Söhbət dövlət sifarişli layihələrdən gedir. Bu zaman işsizlərin sayını qismən azaltmaq mümkün olur. Dəfələrlə belə metodlar dünyada tətbiq olunub. O da məlumdur ki, tikinti sektoru ən çox əməktutumlu sahələrdən biridir. Tikinti sektorunda işin canlanması digər yan sahələrə də öz müsbət təsirini göstərir. Mənzil tikintisi zamanı bir sıra materiallara tələbatın artması ilə yanaşı, mebel istehsalı da artacaq. O cümlədən, digər ev əşyalarının alınmasına tələbat artır. Deməyim odur ki, ipoteka kreditləşməsinə dəstəyin verilməsi çoxşaxəli əhəmiyyət kəsb edir. Bütün bunların nəticəsində işsizlik azalar, əhalinin xeyli hissəsinin sosial vəziyyəti yaxşılaşar. Nəzərə alsaq ki, koronavirusun yaratdığı mənfi fəsadlar fonunda bu işlər görüləcək, o zaman bunun nə demək olduğunu geniş izah etməyə ehtiyac yoxdur”.
Vidadi ORDAHALLI
