İqtisadiyyat naziri Mikayıl Cabbarov müsahibəsində koronavirus pandemiyasının ölkə iqtisadiyyatına təsirlərinin azaldılması ilə bağlı yaradılmış İşçi Qrupun hazırladığı təkliflər barədə danışıb.
İşçi Qrupun rəhbəri Mikayıl Cabbarovun müsahibə zamanı açıqladığı məlumatlar və irəli sürülən konsepsiyalar barədə dedikləri Azərbaycan iqtisadiyyatının postpandemiya dövrünə hazırlıq səviyyəsinin göstəricilərini özündə əks etdirir. Bu göstəricilər nəzəri baxımdan genişmiqyaslıdır. Şübhəsiz ki, praktiki mexanizmi də genişmiqyaslı olacaq. Azərbaycan hakimiyyətinin iqtisadi blokunun hazırladığı təkliflər paketi böhrandan qorunmaq doktrinasıdır və demək olar ki, iqtisadiyyatın bütün sahələrini əhatə edir.
Nazir bildirib ki, qiymətləndirmələrə əsasən, baş verən neqativ proseslər 11 fəaliyyət istiqamətinə 100 faiz təsir edib. Bunlar ictimai iaşə, xidmət, turizm, hotellər və Mall-lar, əyləncə, nəqliyyat və s. sahələrdir. Bu sahələr barədə detallı məlumatlar yekun qərar qəbul edildikdən sonra ictimaiyyətə açıqlanacaq. O da məlum olub ki, bu sektorlarda olan şirkətlərdə muzdlu işçi kimi çalışan hər bir vətəndaş bu proqramla əhatə olunacaq.
Görünən odur ki, proseslərdən zərər çəkən bütün sahələrə yardım ediləcək. O cümlədən, ən çox neqativ təsirə məruz qalan sahələrə də yardım ediləcək.
“Məqsəd ondan ibarətdir ki, koronavirusun yaratdığı mənfi fəsadlar azaldılsın”
Sözügedən məsələ ilə bağlı fikirlərini baki-xeber.com-la bölüşən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, adətən, bu kimi neqativ proseslərdən xidmət sektoru daha çox zərər görür: “Bununla bağlı xüsusi meyarlar var. Həmin meyarlar əsasında müəyyən edilir ki, hansı sahələr daha çox, hansı sahələr daha az neqativ təsirə məruz qalıb. Belə vəziyyətdə turistlərin sayı kəskin azalır. Digər tərəfdən, ticarət və əyləncə mərkəzlərinə gedənlər azalır. Otellər boş qalır və s. Bir sözlə, baş verən neqativ proseslər 11 fəaliyyət istiqamətinə təsir edib. Orada da işləyənlərin sayı hardasa 300 min nəfərə yaxındır. Ona görə də neqativ təsirə məruz qalan sahələrə bir sıra yardımların edilməsi nəzərdə tutulub. Yardım ondan ibarətdir ki, həmin sahələrdə çalışan muzdlu işçilərin əməkhaqlarının yarısını dövlət ödəyəcək. Qalan yarısını isə şirkətlər özü ödəyəcək. Bununla yanaşı, neqativ təsirə məruz qalan sahələr üçün vergi güzəştləri nəzərdə tutulub. Bu da ondan ibarətdir ki, əlavə dəyər və mənfəət vergilərinin ödənilməsi zamanı 50 faiz güzəşt ediləcək. İşsizliklə bağlı sosial paketlər həyata keçiriləcək. Məqsəd ondan ibarətdir ki, koronavirusun yaratdığı mənfi fəsadlar azaldılsın. Hesab edirəm ki, bütün bunlar ümumi işə öz müsbət təsirini göstərəcək”.
Vidadi ORDAHALLI
