02/06/2020 08:53
728 x 90

İcbari tibbi sığortaya tez keçid və Azərbaycanda səhiyyənin köklü dəyişmə perspektivi - Prezident nələri nəzərdə tutdu...

Fikrət Yusifov: “İcbari tibbi sığortaya keçid əhalinin sağlamlığı üçün olduqca önəmli sosial məsələdir”

img

“Hesab edirəm ki, icbari tibbi sığortanın Azərbaycanda tam tətbiq edilməsi nəticəsində biz səhiyyə sistemində çox ciddi dönüşə nail olacağıq”. Bunu Prezident İlham Əliyev “Yeni klinika” tibb müəssisəsində yaradılan şəraitlə tanışlıqdan sonra xəstəxananın kollektivi ilə görüşündə çıxışı zamanı deyib.

Ölkə başçısının fikrincə, icbari tibbi sığorta ilə bağlı üç şəhərdə pilot layihə həyata keçirilib: “Mənə verilən məlumata görə, o şəhərlərin sakinləri İcbari Tibbi Sığorta Agentliyinin fəaliyyətindən çox razıdırlar, həkimlər də razıdırlar və xəstələr də lazımi müalicə alırlar. Ona görə bu ildən başlayaraq ölkə üzrə icbari tibbi sığortaya tam keçid nəzərdə tutulurdu. Ancaq koronavirus xəstəliyinin müdaxiləsi nəticəsində bu proqramın icrası müəyyən dərəcədə təxirə salına bilər. Çünki biz öz addımlarımızı vəziyyətə görə atmalıyıq. O cümlədən, hesab edirəm ki, koronavirusla mübarizədə də biz qabaqlayıcı tədbirlərin görülməsi nəticəsində vəziyyəti nəzarət altında saxlayırıq. Halbuki, bir daha demək istəyirəm, ən inkişaf etmiş ölkələrdə vəziyyət nəzarətdən çıxıbdır. Minlərlə insanın ölməsi və xəstəliyin demək olar ki, dünyada geniş yayılması bütün ölkələr üçün böyük sınaqdır, böyük çağırışdır”.

Görünən odur ki, hökumət icbari tibbi sığortanın səhiyyə sistemində tətbiq edilməsində qərarlıdır. Maraqlıdır, icbari tibbi sığortanın ölkədə tam tətbiq edilməsi hansı üstünlüklər vəd edir?

  • “Nəticədə insanlar vaxtında müayinədən keçəcəklər və öz sağlamlıqlarının qayğısına qalacaqlar”

Məsələyə münasibət bildirən iqtisad elmləri doktoru Fikrət Yusifovun fikrincə, icbari tibbi sığortanın tam tətbiq edilməsi ölkənin səhiyyə sistemində dönüş yarada bilər: “İcbari tibbi sığortaya keçid əhalinin sağlamlığı üçün olduqca önəmli sosial məsələdir. Çünki bizimlə qonşu olan Türkiyə və Rusiyada bu sistem çox gözəl işləyir. O üzdən, gec-tez biz də bu sistemə keçməli idik. Bu ildən etibarən Azərbaycanın bütün bölgələrində mərhələ-mərhələ icbari tibbi sığortanın tətbiq edilməsi nəzərdə tutulub. Regionlar üzrə bu sistemə keçid baş tutacaqdır. Ola bilsin ki, koronavirusla əlaqədar bu proses bir qədər ləngisin. Ancaq ölkədə bu sistem tam tətbiq ediləcək. Bütövlükdə, bu sistemə keçid insanların rahatlığına, sağlamlığının qorunmasına xidmət edir. Əmək fəaliyyəti olan insanlar çox cüzi ödənişlə bununla özlərini sığortalamış olacaqlar. Digər qrup insanların yerinə isə dövlət ödəniş edəcək. Burada söhbət güzəşt qrupuna aid olan insanlardan gedir. Beləliklə, icbari tibbi sığorta sayəsində ölkənin səhiyyə sistemində çox ciddi dönüş əldə olunacaq. Nəticədə insanlar vaxtında müayinədən keçəcəklər və öz sağlamlıqlarının qayğısına qalacaqlar. Sağlamlıqlarında hər hansı problem olacaqsa, onu pulsuz müalicə edəcəklər. Bu da ölkə vətəndaşları üçün çox böyük sosial dəstək hesab olunur”.

Vidadi ORDAHALLI

Son xəbərlər