Azərbaycanın UEFA Avropa Liqasının final oyununa uğurla evsahibliyi etməsi nəinki ölkə ictimaiyyəti, eləcə də beynəlxalq aləm tərəfindən olduqca müsbət göstərici kimi qeyd edilir. Heç şübhəsiz ki, bu, ölkəmizin 2020-ci ilin iyun ayında futbol üzrə Avropa çempionatının 4 oyununa da (üç qrup və bir 1/4 oyunu) çox yüksək səviyyədə evsahibliyi edəcəyini deməyə zəmin yaradır.
Azərbaycanın UEFA Avropa Liqasının final oyununu bu şəkildə təşkil etməsi 2020-ci ildə futbol üzrə Avropa çempionatının da oyunlarının yüksək səviyyədə keçirilməsi üçün ölkəmiz qarşısında hansı perspektivlər açdı?
Ekspertlər hesab edirlər ki, ölkəmiz tərəfindən UEFA Avropa Liqasının final oyununun yüksək səviyyədə təşkil edilməsi ölkəmiz üçün yeni perspektivlər vəd edir. Onların fikrincə, bu amil 2020-ci ildə futbol üzrə Avropa çempionatının keçirilməsinə Azərbaycanın daha yüksək səviyyədə hazırlaşacağını deməyə əsas verir.
Aydın Bağırov: “Bu oyunun yüksək səviyyədə təşkili həm də 2020-ci ildə keçiriləcək Avropa çempionatından əvvəl bir sınaq, test kimi qiymətləndirilməlidir”
“Qol.az” saytının baş redaktoru, tanınmış futbol şərhçisi Aydın Bağırov “Bakı-Xəbər”ə bildirdi ki, sözügedən final qarşılaşmasının ölkəmiz tərəfindən yüksək səviyyədə təşkil edilməsi Azərbaycanın bu sahədə qazandığı böyük təcrübənin təzahürüdür. A.Bağırov hesab edir ki, 2020-ci ildə keçiriləcək oyunlara Azərbaycan daha ciddi şəkildə hazırlaşmalıdır. “Final qarşıdurmasının təşkili baxımından kiçik texniki halları çıxmaq şərtilə, oyuna hazırlığı müsbət qiymətləndirmək olar. Ölkəmiz ilk dəfə idi ki, bu cür böyük oyuna evsahibliyi edirdi. Təhlükəsizlik məsələsindən tutmuş, qonaqların qarşılanmasına, yerləşdirilməsinə və s. qədər hər şey yüksək səviyyədə idi. Bu oyunun yüksək səviyyədə təşkili həm də 2020-ci ildə keçiriləcək Avropa çempionatındən əvvəl bir sınaq, test kimi qiymətləndirilməlidir. İnanıram ki, dövlət qurumları gələn ilə qədər müəyyən kiçik texniki məsələlərin həlli istiqamətində addımlar atacaqlar. Bu da hava reysləri ilə bağlı məsələdir. Amma Avropa çempionatının keçirilməsi belədir ki, ilin sonunda püşkatma olacaq və burada hansı ölkələrin komandalarının Azərbaycana gələcəyi də təxminən müəyyənləşəcək. Futbol üzrə Avropa çempionatına hazırlıq baxımından da bizim xeyli vaxtımız, zamanımız olacaq. Deyək ki, bu dəfə Avroliqa yarımfinalına iki ingilis komandasının gəlməsi iki həftə əvvəldən bilinirdisə, bu dəfə hansı ölkələrin komandalarının gələcəyi artıq bir neçə ay əvvəlcədən bilinəcək. Ona görə də Avropadan, dünyanın başqa ölkələrindən azarkeşlərin, tamaşaçıların da rahat gəlməsi üçün ümid edirəm ki, lazımi şərait yaradılcaq. Bu baxımdan, hesab edirəm ki, Azərbaycan Avroliqanın final oyununu izləyən tamaşaçıları yüksək səviyyədə qəbul etdiyi kimi, Avropa çempionatının oyunlarına baxmağa gələnləri də bu cür yüksək səviyyədə qəbul edəcək. Amma deyim ki, Avropa çempionatı oyunlarının məsuliyyəti daha böyükdür. Bu çempionata tamaşa etməyə gələn qonaqların sayı bu dəfəkindən çox-çox artıq olacaq. Yəni proqnozuma görə, gələn ilin yayında Bakıda 100 minə qədər əcnəbi qonaq olacaq. Onları qarşılamaq, qəbul etmək üçün hesab edirəm ki, dövlət qurumları tərəfindən yüksək səviyyəli işlər görüləcək. Avropa çempionatı oyunlarının Bakıda keçirilməsi ölkəmizin qarşısında yeni perspektivlər açmaq baxımından çox əhəmiyyətlidir və bu onu göstərir ki, Azərbaycan daha yüksək səviyyəli futbol tədbirlərini keçirməyə qadirdir. Bilirsiniz ki, bəzi dairələr Avropa Çempionlar Liqasının Bakıda keçirilən final qarşılaşmasında hansısa nöqsanların, qüsurların olacağını iddia edirdilər, hətta təhlükəsizlik məsələsi barədə də neqativ fikirlər səsləndirilirdi. Təbii ki, bunlar hamısı heç bir əsası olmayan fikirlər idi. Oyunun uğurla keçirilməsi də bu cür qüvvələrin qarayaxmalarının əsassız olduğunu bir daha ortaya qoydu”.
A.Bağırov bildirdi ki, Azərbaycan xalqının qonaqpərvərliyi xarici qonaqların olduqca xoşuna gəlib. Xalqımız matçı izləməyə gələn əcnəbilərə çox yüksək səviyyəli qonaqpərvərlik örnəyi təqdim etdi. “Mən burada xüsusi bir detalı qeyd etmək istəyirəm. Keçən il Kiyevdə Çempionlar Liqasının final oyunu keçirilmişdi. Final zamanı və ondan sonra da Kiyev şəhəri ilə bağlı kifayət qədər narazılıqlar, şikayətlər vardı. Hətta UEFA-nın prezidenti də qeyd etmişdi ki, final oyununa görə Kiyevdə süni qiymət artımı olub. Otellərdə yer olmadığından, hətta qonaqlara hansısa maşın qarajlarında yerlər təklif olunurdu və o yerlərə 100-200 avro civarında qiymətlər qoyulmuşdu. Bu, UEFA-nı da, azarkeşləri də şoka salırdı ki, bu dərəcədə qiymət artımı ola bilməz. Müşahidə etdim ki, Azərbaycanda belə şeylər olmadı, yəni qiymətlərdə heç bir dəyişiklik baş vermədi. Hesab edirəm ki, bu çox yaxşı haldır və bizim xalqın qonaqpərvərliyinin və istiqanlılığının göstəricisidir” - deyə A.Bağırov qeyd etdi.
İradə SARIYEVA
