20/06/2019 05:44
728 x 90

“Arsenal” futbol klubunun rəhbərliyi ən sonda “erməni oyunu”na uydu - 40 oyunda cəmi 8 qol vurmuş qeyri-məhsuldar futbolçuya görə…

img

İngiltərənin “Arsenal” klubu erməni “toruna” düşdüyünü açıq etiraf etmiş oldu. Hələ bir neçə gün əvvəl heç klubun əsas heyətində yerini möhkəmləndirməyi bacarmayan erməni əsilli bir futbolçunun milli mənsubiyyəti üzərindən şou göstərilməyə başladı. Guya həmin şəxsin erməni əsilli olması klub oyunçularının təhlükəsizliyinə və ümumi əhval-ruhiyyəsinə problemlər yarada biləcəyi kimi saxta iddialar ortaya atıldı.

Maraqlıdır ki, həmin vaxt açıqlama verən “Arsenal”ın baş məşqçisi bildirdi ki, Azərbaycanla Ermənistan arasında belə bir münaqişənin olduğundan xəbərsizdir. Bundan əlavə, Azərbaycanın rəsmi qurumları bəyan edərək bildirdilər ki, oyunla bağlı istər komandaların heyətinin, istərsə də tamaşaçıların təhlükəsizliyinə tam təminat verirlər. AFFA, Azərbaycan Xarici İşlər Nazirliyi və Gənclər və İdman Nazirliyi dövlətin adından çıxış edərək, finalın bütün iştirakçılarına, o cümlədən, Mxitaryana təhlükəsizlik zəmanəti veriblər. Eyni zamanda, Azərbaycanın beynəlxalq yarışların keçirilməsi üzrə ciddi təcrübəsi var. Həmin yarışlarda çoxlu sayda erməni idmançı iştirak edib, hətta qalib gələnləri də olub. Prezident İlham Əliyevin yarışların qalibi olan erməni əsilli idmançının boynuna medal asdığı vaxt da olub.

Azərbaycanda olan tolerantlıq, multikultural ənənələrə sadiqlik bütün dünyaya nümunə kimi göstərilir. Təsadüfi deyil ki, müharibə şəraitində olmağımıza baxmayaraq, hazırda ölkəmizdə on minlərlə erməni əsilli vətəndaş yaşayır. Ermənistanda isə bir nəfər də olsun azərbaycanlıya rast gəlmək mümkün deyil. Təbii ki, bütün bu şərtlər erməni əsilli istənilən idmançının təhlükəsizlik şəraitində gəlib, burada iştirak edib, geri qayıda biləcəyini şərtləndirir. Ancaq, görünür, Bakını ermənifob bir şəhər kimi göstərmək istiqamətində aparılan qara piar cəhdlərində erməni lobbisi  nüfuzlu futbol klubunu öz “toruna” sala bilib. 40 oyunda cəmi 8 qol vurmağı bacaran qeyri-məhsuldar bir erməni əsilli futbolçuya görə belə bir qalmaqal yaratmağa dəyərdimi?

Britaniyanın mediası bununla bağlı yazıb: “London klubunun düşərgəsində oyunçulardan birinin təhlükəsizlik problemlərinə görə bu cür ciddi oyunu faktiki olaraq buraxmağa məcbur qaldığı üçün qəzəb hiss olunur. Ötən həftə “Arsenal” UEFA-dan Azərbaycanla Ermənistan arasında davam edən siyasi gərginlik səbəbindən Mxitaryan üçün əlavə təhlükəsizlik zəmanəti tələb etmişdi. Danışıqlar davam edir. “Arsenal”ın qərarı gələn həftənin əvvəlindən gec olmayaraq elan ediləcək, lakin “topçular”ın cərgəsində bu məsələyə nikbin yanaşılmır. Həm klub, həm də oyunçu pərişandırlar”.

Göründüyü kimi, bütün oyunçuların təhlükəsizliyinə ən yüksək səviyyədə təminat verildiyi halda, ingilis klubu erməni təsiri altındakı yararsız təbliğatını davam etdirir.

  • Kənan Məstəliyev: “Yetərincə ciddi məbləğdir və görünən odur ki, bu pul üçün “erməni kartı”nı oynamağa, bu “oyun”a alət olmağa razıdırlar”

Tanınmış futbol mütəxəssisi və şərhçisi Kənan Məstəliyev də “Bakı-Xəbər”ə açıqlamasında  bunun idmanla heç bir əlaqəsi olmayan məkrli erməni təbliğatı olduğu qənaətindədir: “Ermənilər, onların dünyaya yayılan lobbisi həmişə öz “yazıq, hüquqları daim tapdalanan erməni xalqı” kartını oynayıb, maksimum dividend qazanmağa çalışıb. Bu, bütün sahələrdə belədir: siyasətdən tutmuş, idmana qədər. İdman da xüsusilə geniş kütləyə xitab etdiyindən, ən populyarı da məhz futbol olduğundan, bu istiqamətdə “işlədiklərinə” təəccüb etməyə dəyməz.

Hamı bilir ki, erməni idmançıların Azərbaycana gəlib-getməsində, yarışlara qatılmasında heç vaxt problem olmayıb. Onlar burada yetərincə turnirdə iştirak edib, hətta çox sayda uğur, qələbə də qazanıb. Bu zaman Azərbaycan dövləti onların təhlükəsizliyinə təminat verib və sözünün üstündə də durub. Yəni ermənilərin “biz ora gəlsək, başımıza oyun açacaqlar” variantı artıq keçərli deyil. Elə bu dəfə də ən yüksək səviyyədə təminat verilib və bunun üçün lazımi tədbirlər görülüb. Sadəcə, kimlərəsə bu kontekstdə ermənilərə bu tolerant münasibət sərf etmir. Onlar əvvəlcədən də bilirdilər ki, Azərbaycan təminat verəcək və heç bir problem olmayacaq.

O ki, qaldı Henrix Mxitaryana, onun “Arsenal”ın əsas heyət üzvü olmadığını futbolu az-çox izləyən hər kəs bilir. Bundan öncə o, “Mançester Yunayted”ə transfer olunmuş, orada özünü yaxşı tərəfdən göstərə bilmədiyinə görə Aleksis Sançeslə heç bir xərc tələb olunmadan dəyişdirilmişdi. Zaman göstərdi ki, bu addım təsadüfi deyildi, çünki Henrix London klubunda da özünə yer tapa bilmədi. Hələ ötən ilin payızında “Arsenal” Avropa Liqasının qrup mərhələsi çərçivəsində Bakıya gələndə də Mxitaryan zədə bəhanəsilə gəlməmişdi. Onun gəlməməsi heç bir şeyi dəyişmədi və “topçular” 3:0 hesablı rahat qələbə qazanıb evlərinə qayıtdılar. İndi də durum təxminən eynidir. Onun Bakıya gəlib-gəlməməsi, böyük mənada, heç nəyi dəyişməyəcək. Uzaqbaşı 90 dəqiqə ehtiyatda oturub, turist səfəri etmiş olacaq. Ona görə də işin idman tərəfində Henrixin gətirilməməsi komanda üçün elə də böyük faciə olmayacaq.

Və son olaraq “Arsenal” məsələsi. Mxitaryan məsələsi onlar üçün çox yaxşı bəhanə oldu. Bundan və guya ki, yolun çox uzaqlığı məsələsi bəhanəsindən istifadə edərək UEFA-ya təzyiq göstərməyə çalışdılar. Final bir matçdır. Burada ən kiçik məqam belə qələbə gətirə bilər. Məncə, bu yolla onlar oyuna təyin olunan hakimə - Canluka Rokkiyə təzyiq etmək istəyirlər. Daha doğrusu, UEFA-nın ədalət təmsilçisinə “kiçik” bir təlimat verməsini və “azacıq” dəstək verməsini gözləyirlər. Çünki qələbə “Arsenal” üçün çox vacibdir. İngiltərə Premyer-Liqası vasitəsilə Çempionlar Liqasına yollana bilməmələri planları pozub. Bakıda çempion olsalar, bu iş həllini tapacaq və “topçular” gələn mövsümdə əlavə təxminən 80 milyon funt-sterlinq pul əldə edəcəklər. Yetərincə ciddi məbləğdir və görünən odur ki, bu pul üçün “erməni kartı”nı oynamağa, bu “oyun”a alət olmağa razıdırlar”.

Məhəmmədəli QƏRİBLİ

Son xəbərlər