“Mercedes” komandasının pilotu Valtteri Bottas bu gün Azərbaycan Qran-prisinin sıralama turunun qalibi olub.
Onun göstəricisi 1:40.495 olub.
İkinci yeri “Mercedes”in pilotu Lüis Hamilton (1:40,554), üçüncü yeri isə "Ferrari"dən Sebastyan Fettel (1:40.797) tutub.
“Toro Rosso” komandasının pilotu Daniil Kvyat 6-cı yerdə qərarlaşıb.
Azərbaycan Qran-prisinə aprelin 28-i saat 16:10-da start veriləcək.
Formula 1 yarışlarının 4-cü mərhələsində 10 komandanın heyətində 20 pilot iştirak edəcək: «Mercedes» - Lüis Hamilton və Valtteri Bottas, «Ferrari» - Sebastyan Fettel və Şarl Lekler, «Red Bull Racing» - Maks Ferstappen və Pyer Qasli, «Renault» - Daniel Rikkardo və Niko Hülkenberq, «Haas» - Kevin Maqnussen və Roman Qrojan, «McLaren» - Karlos Sayns və Lando Norris, «Racing Point» - Serxio Peres və Lens Stroll, «Alfa Romeo» - Kimi Raykkonen və Antonio Covinatsi, «Toro Rosso» - Daniil Kvyat və Aleksandr Elbon, «Williams» - Corc Rassell və Robert Kubitsa.
2019-cu il çempionatının 3 mərhələsinin yekunları üzrə «Mercedes» komandasının pilotları liderlik edir. L.Hamilton 68 xalla 1-ci, onun komanda yoldaşı V.Bottas 62 xalla 2-ci, «Red Bull Racing» komandasının pilotu M.Ferstappen 37 xalla 3-cü yerdə qərarlaşıb.
Trasın uzunluğu 6,003 km, ümumi məsafə 306,049 km, döngələrin sayı 20-dir. Finiş xəttinə çatmaq üçün pilotlar 51 dövrə vurmalıdırlar.
