"Bu onunla bağlıdır ki, hüquq-mühafizə orqanları və digər müvafiq strukturlar vətəndaşlarla sıx təmasda işləməyi bacarır"
Son zamanlar müxtəlif ölkələrdən radikal İŞİD terror qruplaşmasına qoşulanların sayında azalma müşahidə olunur. Görünən odur ki, belə halların sayı əvvəlki kimi kəskin səviyyədə deyil. Eyni zamanda, artıq İŞİD əvvəlki gücünü və cəlbediciliyini itirib. İŞİD-in meydan suladığı zamanlarda dünyanın bir çox ölkələrindən qruplaşmaya qoşulmaq istəyənlərin sayı yüzlərlə idi.
Təşkilatın ilk silahlandığı ərəfələrdə Azərbaycandan da bəzi şəxslər İŞİD-ə qoşulmaq üçün İraq və Suriyanın yolunu tutmağa başladı. Əvvəlcə Türkiyəyə gedən azərbaycanlılar oradan terror təşkilatının üzvlərinin köməyi ilə qonşu ölkənin sərhədini keçərək İŞİD sıralarına qoşulurdu. Ancaq onların, demək olar ki, bir çoxu orada öldürülüb. Hətta bu, rəsmi səviyyədə də təsdiq olunur. Digər tərəfdən, Suriya və İraqda silahlı döyüşlərdə iştirak etdikdən sonra Azərbaycana qayıdan 60-dan çox şəxs Dövlət Təhlükəsizliyi Xidməti (DTX) tərəfindən həbs edilərək cinayət məsuliyyətinə cəlb olunub. Görülən bu və digər tədbirlər nəticəsində radikal dini qruplaşmalara qoşulan azərbaycanlıların sayında kəskin azalma müşahidə olundu. İŞİD-ə qoşulan azərbaycanlıların sayının kəskin azalması bir sıra amillərlə əlaqələndirilir. Ancaq reallıq ondan ibarətdir ki, bu tendensiya dayanıb. Məlumata görə, son bir ildə İŞİD-ə bir nəfər də azərbaycanlı qoşulmayıb. Ekspertlər bunun səbəbini nə ilə əlaqələndirir?
Sözügedən məsələyə aydınlıq gətirən təhlükəsizlik sahəsi üzrə ekspert Şəmsəddin Əliyev bunu bir sıra faktorlarla əlaqələndirdi: "Əvvəla hardasa insan hüquqlarına qarşı kobud şəkildə müdaxilə, soyqırım halları, dini etiqadla bağlı ayrıseçkilik, millətlərarası ayrıseçkilik varsa, orada dini radikallıq, ekstremizm baş qaldırır. Şükür Allaha, Azərbaycanda kifayət qədər düzgün, düşünülmüş dövlət siyasəti var. Azərbaycanda hər bir dinə hörmət var və dini etiqad azaddır. Hər kəs istədiyi dinə etiqad edə bilər. Bütün bunlar yalnız demokratik islahatların dairəsi böyük olduğu cəmiyyətlərdə olanda, o zaman radikal qruplaşmalara da maraq olmur. Azərbaycanlıların İŞİD-ə qoşulmamasının digər səbəbi də var. Bu onunla bağlıdır ki, hüquq-mühafizə orqanları və digər müvafiq strukturlar vətəndaşlarla sıx təmasda işləməyi bacarır. Çünki məlumatlar yalnız vətəndaş cəmiyyətindən və vətəndaşlardan daxil olur. Bu mənada polis orqanlarının, Dövlət Təhlükəsizliyi Xidmətinin cəmiyyətlə sıx təmasda olması belə halların qarşısını alır. Görülən kompleks tədbirlər öz nəticəsin verir. Yəni sözügedən məlumatlar daxil olanda ona çevik reaksiya verilir. Nəticədə cəmiyyətə zidd ünsürlərin qarşısı alınır. O üzdən, radikal qruplaşmaya qoşulanların sayı yox səviyyəsinə enib. Bu bizim uğurumuzdur".
Vidadi ORDAHALLI
