Azər Həsrət: "Mənə elə gəlir ki, jurnalistlərin ümumi mənafeyini qoruyan, təmsil edən bir təşkilat..."
Deyəsən jurnalistlərin ictimai nəqliyyatdan pulsuz istifadə etməsi gerçəkləşir. Bakı Nəqliyyat Agentliyinin ictimaiyyətlə əlaqələr sektorunun rəhbəri Nuridə Allahyarova mətbuata açıqlamasında bildirib ki, bunun üçün gələcəkdə həmin şəxslərə güzəştli kartların verilməsi nəzərdə tutulur.
Bununla yanaşı, N.Allahyarova indi media mənsublarına belə bir güzəştin verilmədiyini deyib: "Hazırda jurnalistlərin nəqliyyatdan istifadəsi pulsuz deyil".
Məlumat üçün qeyd edək ki, son günlər jurnalistlərin nəqliyyatdan pulsuz istifadəsi məsələsi müzakirə olunur. Bununla bağlı müxtəlif fikirlər səslənir. Kütləvi informasiya vasitələri haqqında 1992-ci ildə qəbul edilən, 1999-cu ildə isə qüvvədən düşən qanunun V fəsil 39 maddəsinin 9-cu bəndində jurnalistlərin şəhər, rayondaxili ictimai nəqliyyatdan (taksidən başqa) pulsuz istifadə etməsi yer almışdı. Təbii ki, qanun qüvvədən düşəndən sonra yenisi ilə əvəzlənib. Ancaq yeni qanunda yuxarıda qeyd etdiyimiz bənd çıxarılıb. O baxımdan yeni qanuna dəyişiklik edilərək jurnalistlərin ictimai nəqliyyatdan pulsuz istifadə etməsi bərpa oluna bilərmi? Ümumən buna ekspertlərin münasibəti necədir?
Məsələyə münasibət bildirən media eksperti Azər Həsrət nəqliyyatda jurnalistlərə güzəşt olunmasına müsbət baxır. Ancaq onun fikrincə, bunu qanunvericiliklə tənzimləmək çətindir: "Çünki ictimai nəqliyyat Bakı şəhərində faktiki olaraq özəl sahibkarların əlindədir. Təbii ki, onların da boynuna vəzifə qoyulmur ki, hansısa kateqoriyadan olan vətəndaşlar üçün mütləq şəkildə pulsuz gediş təmin etsinlər. O baxımdan düşünmürəm ki, bunu qanunvericiliklə həll etmək olar. Mənə elə gəlir ki, jurnalistlərin ümumi mənafeyini qoruyan, təmsil edən bir təşkilat - məsələn, Mətbuat Şurası sahibkarlarla fərdi şəkildə danışıqlar apara bilər. Aparılan danışıqlar nəticəsində MŞ-nin kartını daşıyan jurnalistlərin nəqliyyatdan pulsuz istifadəsi üçün müəyyən razılıq əldə oluna bilər. Təbii ki, bunun qarşılığında MŞ onlara nəsə təklif etməlidir. Hansısa KİV-də həmin şirkətlərin pulsuz reklamının təşkil edilməsi, yaxud da ümumi maraqlara xidmət edən məsələlərlə bağlı ortaq bir məxrəcə gəlmək olar. Yəni bunun ən asan və bürokratiyadan uzaq yolu budur. Hesab edirəm ki, MŞ bununla bağlı təşəbbüs qaldırmalı və sahibkarlarla, ayrı-ayrı ictimai nəqliyyat xətlərini işlədən şəxslərlə görüşüb ümumi bir məxrəcə gəlinməlidir. Ondan sonra jurnalistlər nəqliyyatdan pulsuz istifadə edə bilər". Vidadi ORDAHALLI
