Bakıda İslam Əməkdaşlıq Təşkilatına Üzv Dövlətlərin Jurnalistlər Assosasiyasının konfransı keçirilib. Trend-in məlumatına görə, konfransda Azərbaycan Prezidentinin ictimai-siyasi məsələlər üzrə köməkçisi Əli Həsənov, Azərbaycanın mətbuat qurumlarının rəhbərləri, İslam dövlətlərinin Bakıdakı diplomatik korpuslarının nümayəndələri iştirak edib.
Tədbiri giriş sözü ilə açan İƏT-ə üzv dövlətlərin Jurnalistlər Assosasiyasının sədri Fazil Abbasov təşkilatın yaradılmasının vacibliyini qeyd edib. O bildirib ki, bu gün İslam ölkələri jurnalistlərinin bir araya gəlməsinə böyük ehtiyac var. F.Abbasov bildirib ki, bu gün qərb dövlətlərində islam haqqında yalnış fikir formalaşdırılır və bu baxımdan islam ölkələrinin jurnalistlərinin bir araya gələrək həqiqətləri dünya ictimaiyyətinə çatdırmasına böyük ehtiyac var.
Tədbirdə çıxış edən Səudiyyə Ərəbistanının Azərbaycandakı səfiri Musaid Bin İbrahim Al-Sulaim təşklatın yaradılmasının bu gün üçün çox vacib olduğunu qeyd edib. O bildirib ki, informasiya texnologiyalarının inkişafı media sahəsinə də təsir edir və yeni fəaliyyətlər tələb edir. Səfir deyib ki, yeni yaradılan təşkilat müsəlman ölkələrinin problemlərini dünyaya çatdırmaq üçün vacib rol oynaya bilər. Səfir deyib ki, müsəlman ölkələrinin jurnalistləri müsəlman cəmiyyətinə xidmətlə bağlı öz məsuliyyətlərini dərk etməli, müsəlman dövlətləri arasında əlaqələrin inkişafına öz töhfələrini verməlidir. Səfir qeyd edib ki, bu baxımdan müsəlman ölkələrinin jurnalistlərini bir araya gətirəcək bir təşkilatın yaradılması çox müsbət haldır.
Konfransda çıxış edən İranın Azərbaycandakı səfirnin müavini Davud Çərmi bildirib ki, İƏT-ə üzv dövlətlərin Jurnalistlər Assosasiyası islam ölkələri arasında əməkdaşlığın gücləndirilməsinə öz töhfəsini verəcək: “Biz də bu təşkilatın yaradılmasını dəstəkləyirik. Belə bir təşkilatın yaradılması islam ölkələri arasında birbaşa informasiya mübadilsinin düzgün aparılmasına kömək olacaq və islam haqqında yanlış rəyin aradan qaldırılmasına öz töhfəsini verəcək”.
Türkiyənin Azərbaycandakı müvəqqəti işlər vəkili Meral Barlas konfransda çıxış edərək deyib ki, bu gün islam ölkələri arasında əlaqələrin gücləndirilməsi və həqiqətlərin dünya ictimaiyyətinə çatdırılması baxımından jurnalistikanın üzərinə məsuliyyət düşür. M.Barlas vurğulayıb ki, bu gün Türkiyə ilə Azərbaycan jurnalistləri arasında geniş əlaqələr mövcuddur: “Bu gün İƏT çərçivəsində də jurnalistlər arasında əlaqələrin gücləndirilməsi vacibdir. Çünki bu gün islam ölkələri jurnalistlərinin həqiqətləri doğru şəkildə dünyaya çatdırılması vacib əhəmiyyət kəsb edir. Bu baxımdan bu təşkilatın yaradılmasına dəstəyimizi nümayiş etdiririk”.
Tədbir digər məruzə və çıxışlarla davam edib.
İƏT-ə üzv dövlətlərin Jurnalistlər Assosiasiyasının konfransının bəyanatı
İslam Əməkdaşlıq Təşkilatına üzv dövlətlərin Jurnalistlər Assosiasiyasının Bakıda keçirilən konfransının bəyanatı qəbul edilib. Bəyanatda qeyd edilir ki, İslam dini haqqında yanlış rəy formalaşdırmaq cəhdləri narahatlıq doğurur:
“Biz jurnalistlər təəssüflə qeyd edirik ki, qərbin islamafob dairələri, onların idarə etdiyi transmilli KİV-lər və təşkilatlar müsəlman dünyasında baş verən hadisələri, prosesləri birtərəfli və əsasən qərəzli formada təqdim edirlər. Buna görə də beynəlxalq ictimaiyyətdə müsəlman ölkələri və İslam dini haqqında yanlış təsəvvür yaranır. Beləliklə, İslam terrorla eyniləşdirilir, hər bir müsəlman isə potensial terrorçu obrazında təqdim olunur. Yaranmış vəziyyət müsəlman ölkələri arasında fikir ayrılıqlarının aradan qaldırılmasının, vahid mövqeyin formalaşdırılmasını tələb etdiyi kimi informasiya sahəsində də qarşılıqlı əlaqələrin gücləndirilməsini zərurətə çevirib”.
Bəyanatda nəzərə çatdırılıb ki, 2012-ci ildə Qabonun paytaxtı Librevil şəhərində İƏT-ə üzv ölkələrin informasiya nazirlərinin 9-cu toplantısında informasiya sahəsində əməkdaşlıqğın gücləndirilməsi məqsədilə qərar qəbul edilib:
"2014-cü il dekabrın 3-də Tehranda keçirilən növbəti toplantısına İƏT-ə üzv ölkələrin Jurnalistlər Assosiasiyasının yaradılması barədə təkliflər səsləndirilib və bu müsbət qarşılanıb. Biz 2016-cı il oktyabrın 3-də Azərbaycanın paytaxtı Bakı şəhərində keçirilən konfrasın iştirakçıları İƏT-ə üzv dövlətlərin Jurnalistlər Assosiasiyasının yaradılmasını dəstəklədiyimizi bəyan edirik. Bu məsələnin İƏT-ə üzv ölkələrin informasiya nazilərinin 11-ci toplantısının müzakirəsinə çıxarılmasına, 2017-ci ildə Bakı şəhərində İƏT-ə üzv dövlətlərin jurnalistlərinin iştirakı ilə yeni yaranmış qurumun birinci konfransının təşkili üçün İƏT katibliyindən müvafiq tədbirlərin görülməsini xahiş edirik”.
