Şimali Koreyanın zəlzələ effekti yaradan hidrogen bombası sınağı, bölgədə yeni raket sınaqları və hərbi təlmləri də artırıb. Cənubi Koreyanın şərq sahillərində raket sınaq təlimlərindən saatlar sonra Şimali Koreyanın yeni bir sınağa hazırlaşdığına dair xəbərlər yayılıb.
Baki-xeber.com xəbər verir ki, “Associated Press” (AP) xəbər agentliyi, Şimali Koreyanın yeni bir balistik raket sınağına hazırlaşdığı barədə xəbər yayıb. Cənubi Koreya mediası Müdafiə Nazirliyindəki qaynaqlara istinadən xəbər verir ki, atılacaq raketlər böyük ehtimalla qitələrarası raketlər olacaq.
Cənubi Koreya Şimali Koreyanın mümkün hücumlarına qarşı “Hyunmoo-II” ballistik raketlərin sınağını keçirib. Ölkənin hansı bölgəsindən atıldığı açıqlanmayan və Ş.Koreyaya cavab mesajı olduğu bildirilən raketlərin sadəcə görüntüləri yayılıb.
Cənubi Koreya ordusu eyni zamanda şimal sərhədində Paju şəhərində də hərbi təlimlərə başlayıb. “Reuters” xəbər verir ki, ABŞ və Cənubi Koreya artan təhlükəyə qarşı daha çox təlim keçirməyi planlaşdırır.
Rusiya xarici işlər nazirinin müavini Sergey Ryabkov Şimali Koreyanın real nüvə təhdidi olmadığını iddia edib. Ryabkov bildirib ki, Moskva Cənubi Koreyada yerləşdiriləcək yeni ABŞ raket əleyhinə müdafiə sisteminə cavab verəcək. Onun sözlərinə görə, Rusiya sərhədləri yaxınlığında THAAD raket əleyhinə müdafiə sisteminin qurulması Moskvanın hərbi müdaxiləsi məsələsini qaldıra bilər: "Bütün bunlar belə həyəcanverici templə baş verərsə, ehtimal ki, hansısa kontrbalansın yaradılmasında bizim də hərbi reaksiyamız qaçılmaz olacaq. Mən heç nəyi öncədən mühakimə etmək istəmirəm. Ancaq bəzi şeylər kontekstdən kənar qəbul edilə bilməz".
O, qeyd edib ki, Moskva ABŞ-ın bu planına qarşı öz mənfi münasibətini gizlətmir.
ABŞ müdafiə naziri Ceyms Mattis Şimali Koreyadan ABŞ və onun müttəfiqlərinə ünvanlanmış hər hansı bir hədəyə “kütləvi hərbi cavab” veriləcəyini bəyan edib. Mattis deyib ki, prezident Tramp Şimali Koreyadan qaynaqlanan nüvə təhlükəsinin qarşısını almaq üçün “çox sayda seçimin” hər biri haqda məlumatlandırılmasını istəyib: "Bizim müttəfiqlərimiz qarşısında öhdəliymiz möhkəmdir".
"ABŞ, və Quam da davil olmaqla onun ərazilərinə, və müttəfiqlərimizə qarşı hər hansı bir hədə kütləvi hərbi cavabla qarşılanacaq" - Mattis deyib.
Mattis Şimali Koreya lideri Kim Conq İni BMT Təhlükəsizlik Şurasının Şimali Koreyanın nüvə proqramına qarşı yekdilliklə qəbul etdiyi mövqeni nəzərə almağa çağırıb. O, eyni zamanda ABŞ-ın hərbi potensialını vurğulayıb: "Biz bir ölkənin, konkret olaraq Şimali Koreyanın total məhvini istəmirik, ancaq dediyim kimi, bizim bunu etmək üçün çox sayda seçimlərimiz var".
Qeyd edək ki, bundan əvvəl ABŞ prezidenti Donald Tramp Pxenyanı indiyə qədər keçirdiyi ən böyük nüvə sınağına görə qınayıb və Şimali Koreyanı “rəzil ölkə” adlandırıb. Tramp bildirib ki, Şimali Koreyanın sözləri və əməlləri Birləşmiş Ştatlar üçün düşmən və təhlükəli xarakter daşımaqda davam edir: “Şimali Koreya böyük nüvə sınağı keçirib. Onların sözləri və əməlləri Birləşmiş Ştatlar üçün düşmən və təhlükəli xarakter daşımaqda davam edir”.
ABŞ lideri Şimali Koreyanı Çin üçün böyük təhlükə adlandırıb və Pekinin problemin həll edilməsinə çalışsa da, buna az uğurla nail ola bildiyini bildirib.
Tramp son açıqlamasında isə Şimali Koreyaya qarşı nüvə silahlarından istifadə etməyə hazır olduqlarını deyib.
Bundan başqa, ABŞ prezidenti Şimali Koreya ilə ticarət əlaqələrini davam etdirən hər hansı ölkə ilə ticarət əlaqələrini kəsəcəklərini bəyan edib.
Qeyd edək ki, Şimali Koreyanın dünən sınaqdan keçirdiyi hidrogen bombası dünyanın ən təhlükəli silahıdır. Bombanın dağıdıcı təsiri 120 kilotondur. Bu, 120 min ton TNT partamasına bərabərdir və bir neçə şəhəri xəritədən silmək güvünə malikdir.
Ekspertlər deyirlər ki, sınaqdan keçirilmiş hidrogen bombası Birləşmiş Ştatlar tərəfindən Hiroşimaya atılan atom bombasından 8 dəfə güclüdür.
