Dünyanın qorxduğu oldu, Şimali Koreya altıncı nüvə sınağını keçirdi. Bu dəfə dünyanın ən təhlükəli silahını - hidrogen bombasını sınaqdan keçirdi. Baki-xeber.com xəbər verir ki, sınaqdan əvvəl Şimali Koreyanın KCNA agentliyi Kim Çen Inin hidrogen bombasına baxış keçirdiyinə dair xəbər yayıb.
Şimali Koreyanın dövlət mediası həmin qurğunun yeni növ hidrogen bombası olduğunu və ballistik raketə sığdığını bildirib.
Bu xəbərdən bir neçə saat sonra bölgədə gerçək zəlzələ baş verib. Sonradan məlum olub ki, Ş.Koreya İkinci Dünya Müharibəsi zamanı 135.000 nəfərin həyatına son qoyan Hiroşima atom bombasından dəfələrlə güclü hidrogen bombasını sınaqdan keçirib və nəticədə 6.3 bal gücündə zəlzələ baş verib..
Zəlzələnin ardından, Şimali Koreya hidrogen bombasını müvəffəqiyyətlə sınaqdan keçirdiyini açıqlayıb.
Bu növ nüvə bombası adi atom bombasından dəfələrlə güclü və dağıdıcıdır və şəhərləri məhv etmək gücünə malikdir.
ABŞ Geoloji Tədqiqatlar Mərkəzi də nüvə sınağının təxminən 6.3 bal gücündə zəlzələ yaratdığını deyib. Çin isə ilk zəlzələdən sonra bölgədə 4.6 bal gücündə ikinci zəlzələnin baş verdiyini bəyan edib.
NORSAR müstəqil seysmik araşdırma mərkəzi hesab edir ki, partlayış 120 min ton trotil partlayışına ekvivalent olub. Yəni 2016-cı ilin sentyabrında Şimali Koreyanın öz sınağından dəfələrlə güclü olub. NORSAR qrupuna əsasən bomba 1945-ci ildə Hiroşimaya atılan nüvə bombasından 8 dəfə güclüdür.
Yapon Meteorologiya Xidməti isə partlayışın əvvəlki nüvə sınaqlarından ən az on dəfə güclü olduğunu bildirib.
ABŞ prezidenti Donald Tramp Pxenyanı indiyə qədər keçirdiyi ən böyük nüvə sınağına görə qınayıb və Şimali Koreyanı “rəzil ölkə” adlandırıb. Tramp bildirib ki, Şimali Koreyanın sözləri və əməlləri Birləşmiş Ştatlar üçün düşmən və təhlükəli xarakter daşımaqda davam edir: “Şimali Koreya böyük nüvə sınağı keçirib. Onların sözləri və əməlləri Birləşmiş Ştatlar üçün düşmən və təhlükəli xarakter daşımaqda davam edir”.
Tvitter səhifəsində yazdığı bir neçə mesajda ABŞ lideri Şimali Koreyanı Çin üçün böyük təhlükə adlandırıb və Pekinin problemin həll edilməsinə çalışsa da, buna az uğurla nail ola bildiyini bildirib: “Şimali Koreya rəzil bir ölkədir və problemin həllinə çalışan, lakin çox az uğur qazanan Çin üçün böyük təhlükə və təhdid təşkil edir”.
Lakin Tramp eyni zamanda, ABŞ-ın müttəfiqi olan Cənubi Koreyanı da tənbeh edərək bildirib ki, Seulun Pxenyanı razı salmaq tonunda danışıqları heç bir işə yaramır: “Cənubi Koreya görür ki, mənim onlara dediyim kimi, onların Şimali Koreyanı razı salmaq tonunda danışıqları işə yaramır, onlar yalnız bir şeyi başa düşürlər!”.
Ekspertlərin fikrincə, Tramp “Onlar yalnız bir şeydən anlayırlar” deməklə, əslində Koreyaya hərbi müdaxiləni nəzərdə tutur.
Onu da qeyd edək ki, Trampın Cənubi Koreyanı tənqid etməsi və ölkənin yeni prezidenti Mun Jaeinin Şimali Koreya ilə danışıqlar təşəbbüsü ABŞ liderinin Seulla Milli Təhlükəsizlik məsələləri üzrə müşavir Makmaster və baş iqtisadi müşavir Qeri Conun etirazlarına baxmayaraq, azad ticarətə dair sazişə son qoymağa hazırlaşdığı bir vaxta təsadüf edir. ABŞ və Cənubi Koreya arasında ticarət dövriyyəsi keçən il 112 milyard dollar təşkil edib. Lakin ABŞ-ın transaksiyalarada ticarət defisinin 27 milyard dollardan çox olması Trampın narahatlığı üçün əsas yaradıb.
İngiltərə xarici işlər naziri Boris Conson isə, hazırda hərbi müdaxilə ehtimalının yaxşı bir fikir olmayacağını vurğulayıb.
Şimali Koreyanın yeganə əsas müttəfiqi olan Çin isə Pxenyanı “beynəlxalq ictimaiyyətin geniş etirazlarını nəzərə almayaraq, yenidən nüvə sınağı keçirdiyini” bildirib.
Rusiya Şimali Koreyanın Koreya yarımadasında və bütünlüklə dünyada sülhə və təhlükəsizliyə ciddi hədə yaratdığını və nüvə sınağının ən ciddi şəkildə qınanmalı olduğunu bildirib. Moskva maraqlı tərəfləri dərhal dialoq masasına qayıtmağa çağırıb.
Cənubi Koreya isə BMT-nin sanksiyaları da daxil olmaqla, Pxenyanın bundan sonra daha da təcrid olunması məqsədilə mümkün bütün ölçülərin götürülməsinə çalışacağını bildirib.
Tramp prezident postuna əyləşdikdən sonra dəfələrlə nüvə müharibəsinin bir addımlığına gəldiyi Şimali Koreyanı Çin vasitəsilə dayandırmağa çalışıb, amma son tablo onu göstərir ki, ABŞ prezidentinin bu cəhdi uğursuz olub. Çünki Pxenyan rəhbərliyi Pekinin təzyiqlərinə baxmayaraq, nüvə texnologiyasını inkişaf etdirməkdə davam edir və həmin silahın ABŞ ərazisinə çata bilməsini qarşısına məqsəd qoyub.
Təhlilçilər də yayılan bəyanatlara ehtiyatlı yanaşmağı tövsiyə etsələr də, Şimali Koreyanın nüvə qüdrətinin gücləndiyi göz qabağındadır.
