Gürcüstanın sabiq prezidenti və Odessanın sabiq qubernatoru Mixeil Saakaşvilinin qardaşı David Ukrayna polisi tərəfindən saxlanaraq Dövlət Miqrasiya Xidmətinə aparılıb.
Mixeil Saakaşvili qardaşının saxlanılması barədə xəbəri bundan əvvəl verib, lakin Ukrayna Daxili İşlər Nazirliyinin sözçüsü Artyom Şevçenko hüquqi saxlanmanın baş vermədiyini deyib. "Biz onu saxlamadıq. Kiyev milli polis xidməti Gürcüstan vətəndaşını miqrasiya xidmətinə təhvil verib", İnterfaks Şevçenkonun dediyini yazıb.
O, David Saakaşvilinin Ukraynada yaşayışı üçün icazəsinin mart ayında, işləməsi üçün icazənin isə bundan da əvvəl ləğv edildiyini bildirib. "Hələ o vaxtı xarici vətəndaşa [David Saalaşvili], onun Ukraynada yaşaması üçün səbəb qalmadığı lazımi şəkildə izah edilmişdi. Lakin o, qanun tərəfindən təyin edilən müddətdə ölkəmizin ərazisini tərk etmədiyi üçün hazırda ölkəmizin ərazisində qanunsuz olaraq qalır", - Şevçenko jurnalistlərə deyib.
David Saakaşvili Ukrayna miqrasiya xidməti tərəfindən saxlanılır və onun "özünün istədiyi hər hansı bir ölkəyə qaytarılması və ona qarşı inzibati xəta cəriməsi müzakirə edilir", o, əlavə edib.
Ukrayna Sosialist Partiyasının rəhbəri və Daxili İşlər Nazirinin keçmiş müşaviri İlya Kiva David Saakaşvilinin deportasiya üçün hazırlandığını Ukraynanın 112 Ukrayna telekanalına xəbər verib.
Mixeil Saakaşvili qardaşının saxlandığını şənbə günü, Facebook vasitəsilə bildirib. "Bu gün səhər tezdən saat 8-də, Avakovun DİN-in əməkdaşları mənim qardaşımı Kiyevdəki evindən çıxarkən saxlayıb naməlum istiqamətdə aparıblar", Saakaşvili yazıb. O, qardaşının Ukraynada yaşaması üçün icazəsi olduğunu israr edərək, Davidin saxlanmasının Ukrayna hökumətinin ona qarşı təyziq etmə cəhdi olduğunu deyib.
İyulun 26-sı məlum olub ki, Ukrayna prezidenti Petro Poroşenko Mixeil Saakaşvilinin Ukrayna vətəndaşlığını ləğv edilməsinə əmr verib. O, deyib ki, buna səbəb pasporta müraciətində Gürcüstanın keçmiş prezidentinin yalan məlumat verməsi olub. Mixeil Saakaşvili bu addımı siyasi repressiya adlandırıb. Ukrayna miqrasiya xidməti Mixeil Saakaşvilinin pasportunun ləğv edildiyini təsdiqləyib. Lakin son bir neçə gün ərzində bir neçə Avropa ölkəsinə səyahət edən keçmiş prezident, bu səyahətlərdə məhz Ukrayna pasportundan istifadə etdiyini bildirib.
Hazırda Mixeil Saakaşvili Polşadadır. Bundan iki həftə əvvəl, o, sentyabrın 10-u Ukraynaya qayıdacağını və insanları "etiraz etməyə səfərbər edərək" pasportunu geri alacağını deyib.
