Rusiyanın San Fransiskodakı Baş Konsulluğu, Vaşinqton və Nyu Yorkdakı ticarət nümayəndəliklərinin yerləşdiyi binalar Dövlət Departamentinin tələbi ilə Amerika tərəfinə verilib. APA-nın xəbərinə görə, bunu “RİA Novosti”yə Rusiya və ABŞ nümayəndələri təsdiqləyiblər. Rusiya tərəfi binalarda FTB əməkdaşlarının iştirakı ilə qanunsuz axtarışların aparıldığını iddia edir. ABŞ tərəfi isə FTB-nin iştirakını inkar edir və söhbətin axtarışlardan deyil, adi yoxlama və ya təftişdən getdiyini iddia edir.
Rusiyanın Xarici İşlər Nazirliyi Rusiya hökumətinin Amerikadakı binalarında axtarış aparmağa etiraz etmək məqsədilə ABŞ diplomatını nazirliyə çağırıb.
Nazirlik yaydığı bəyanatda Rusiyanın Vaşinqtonda şənbə günü bağlanması gözlənilən diplomatik binada “qeyri-qanuni axtarış” ilə əlaqədar olaraq nazirliyə ABŞ-ın Moskvadakı səfirinin baş köməkçisi Antoni Qodfrini çağırdığını bildirib.
Rusiyalılar planlaşdırılmış yoxlamanı “daha öncə görünməmiş” aqressiv addım adlandırıb. Qodfri nazirliyə Rusiya Xarici İşlər Nazirliyi Federal Təhqiqatlar Bürosunu San Fransiskodakı konsulluğunda axtarış aparmağı planlaşdırmaqda ittiham edəndən bir gün sonra çağırlıb.
ABŞ binalarda axtarış aparmaq niyyətində olub-olmadığını deməyib.
Nazirliyin sözçüsü Mariya Zaxarova bu axtarışın “Rusiya vətəndaşlarının” təhlükəsizliyinə hədə yaradacığını deyib.
Bu arada isə “Associated Press” konsulluğun bacasından qara tüstünün çıxdığı görüləndən sonra oraya yanğınsöndürənlərin çağırıldığını, lakin binaya daxil olmalarına icazə verilmədiyi barədə məlumat yayıb.
Yanğınsöndürənlər binada ocaqda nəyinsə yandığını bildirib.
San Fransisko Yanğın Departamentinin sözçüsü Mindi Talmadc isə müxbirlərə bayırda havanın 35 dərəcə olduğu bir gündə binada ocağın nə üçün yandığını başa düşmədiklərini deyib.
Qeyd edək ki, ABŞ sentyabrın 2-dək Rusiyanın San Fransiskodakı Baş Konsulluğunu, Vaşinqton və Nyu York şəhərlərindəki konsulluq obyektlərini bağlamağı tələb etmişdi.
Xatırladaq ki, ABŞ Konqresində qəbul olunan sanksiya qanunundan sonra Rusiya hökuməti ölkə ərazisindəki ABŞ diplomatik missiyalarının əməkdaşlarının sayını bu ölkədəki Rusiya diplomatik missiyalarının əməkdaşlarının sayına uyğunlaşdırıb - 455 nəfər. Nəticədə Rusiyadakı ABŞ missiyaları 755 nəfər ixtisara salınıb. Bundan başqa, Rusiya Moskva ətrafında ABŞ diplomatlarının istifadə etdiyi bağ evinə, eləcə də paytaxtdakı Dorojnaya küçəsində yerləşən anbarlara həbs qoyub.
ABŞ, buna cavab olaraq, Rusiya ərazisində qeyri-immiqrasiya vizalarının verilməsi prosedurunu qeyri-müəyyən müddətə dayandırıb.
