“ABŞ Krımın Rusiya Federasiyası tərəfindən ilhaqını heç vaxt qəbul etməyəcək”. APA-nın “RBK-Ukraina” saytına istinadən verdiyi xəbərə görə, bu sözləri Ukraynanın Müstəqillik günü ilə əlaqədar bu ölkədə səfərdə olan ABŞ-ın müdafiə naziri Ceyms Mettis deyib.
Prezident Pyotr Poroşenko ilə görüşdən sonra keçirilən mətbuat konfransında çıxış edən amerikalı nazir ABŞ-ın Ukrayna ilə birlikdə olduğunu bildirib: “Amerika Birləşmiş Ştatları Ukraynanın yanında dayanır. Biz Krımın ilhaqını qəbul etmirik və heç vaxt qəbul etməyəcəyik”.
C. Mettis ABŞ-ın Ukraynanın ərazi bütövlüyünü dəstəklədiyini vurğulayıb: “ABŞ və onun müttəfiqləri Minsk razılaşmalarını yerinə yetirməsi üçün Rusiyaya təzyiq edəcəklər”.
P. Poroşenko isə görüşdə Rusiya təcavüzünə qarşı atılacaq addımları müzakirə etdiklərini söyləyib: “Bugünkü danışıqlarda biz sözsüz ki, Rusiyanın Ukraynaya qarşı təcavüzünə qarşı atılacaq addımları nəzərdən keçirdik – bu, əsas məsələdir”.
ABŞ müdafiə naziri Ceyms Mettis Ukraynaya müdafiə təyinatlı letal (öldürücü) silahların verilməsini nəzərdən keçirdiklərini də açıqlayıb. Nazir Ukraynaya səfərinin yekunları əsasında bu barədə ABŞ rəhbərliyinə tövsiyələr təqdim edəcəyini bildirib: “Müdafiə məqsədli letal silahlardan söhbət gedirsə, biz bu məsələni nəzərdən keçiririk. Mən indi qayıdıram və burada gördüklərim, öyrəndiklərim barədə sözsüz ki, ölkə rəhbərliyini məlumatlandıracağam. Mən çox konkret şeylər barədə tövsiyə verəcəyəm ki, onlar həyata keçirilsin”.
Nazir artıq Ukraynaya 175 milyon dollar dəyərində hərbi texnikanın göndərilməsi barədə qərarı təsdiqlədiklərini söyləyib.
Ukrayna prezidenti Pyotr Poroşenko isə bu məsələnin sakitlik tələb etdiyini vurğulayıb: “Mən bu gün bu məsələni şərh etmək istəməzdim. Lakin onu deyə bilərəm ki, müzakirələrdən məmnunam”.
Qeyd edək ki, Ukraynanın müdafiə naziri Stepan Poltorak tank əleyhinə və hava hücumundan müdafiə sistemlərinə ehtiyac duyduqlarını açıqlayıb.
