ABŞ-la artan nüvə gərginliyi fonunda Şimali Koreya gözlənilməz bir addım atıb. Baki-xeber.com xəbər verir ki, Çin və Cənubi Koreyanın tərəflərə çağırışlarından sonra Kim Çen geri çəkilib. Şimali Koreya bu ay ərzində ABŞ-ın Sakit Okeandakı torpağı olan Quam adasına nüvə bombası atacağı qərarını hələlik ertələdiklərini bəyan edib.
Şimali Koreya lideri Kim Çenın ona təqdim edilən planları dəyərləndirdiyini və əvvəldən elan edilən ballistik raket sınağını hələlik təxirə saldığını açıqlayıb. O, raket sınağı ilə bağlı qərar vermədən əvvəl bir müddət qarşı tərəfin hərəkətlərini izləyəcəyini bildirib və digər ölkələrin Koreya yarımadası ilə ətrafında təhlükəli hərəkətlərini davam etdirəcəyi halda raket sınağının keçirilməsinə razılıq verəcəyini deyib.
Kim Çenin digər ölkələr dediyi ABŞ və Cənubi Koreyadan gözlədiyi addımlar gələn ay reallaşdırılacaq ABŞ-Cənubi Koreya birgə hərbi təlimlərinin təxirə salınması və ya B1 bombardmançı təyyarələrinin Koreya yarımadası üzərində uçuşunun dayandırılmasıdır.
Şimali Koreya rəhbərliyi hər iki vəziyyəti hərbi təxribat kimi qiymətləndirir. O, Quam adasına raket hücumunun ssenarisi haqqında məlumatlandırılıb. Şimali Koreya mediası qeyd edir ki, Kim Çen In Quama hücum qərarını ABŞ-ın addımlarına görə verəcək. O, hərbçiləri düşmənə hər an zərbə endirməyə hazır olmağa da çağırıb.
"Bölgəmizə çox sayda nüvə avadanlıqlarını ilk gətirmiş olan Amerika Birləşmiş Ştatları əvvəlcə doğru qərarı almalı və Koreya yarımadasında artan təzyiqi aşağı salmaq və təhlükəli bir döyüşü önləmək istəyirsə, bunu hərəkətləri ilə də göstərməlidir" - deyə Şimali Koreya liderinin adından bildirilib.
Pxenyan keçən həftə ABŞ torpağı olan Quam adasına 4 raket zərbəsi üçün plan hazırladığını bildirmişdi.
Bu arada, Şimali Koreyanın qitələrarası ballistik raket texnologiyasını Ukraynadakı Sovet dövründən qalmış raket zavodundan "qara bazar" vasitəsilə əldə etdiyinə dair hesabat açıqlanıb.
ABŞ-da mənzillənən Beynəlxalq Strateji Araşdırmalar Mərkəzinin açıqladığı hesabatda Şimali Koreyanın ABŞ-ı da vura biləcəyi iddia edilən qitələrarası ballistik raketləri uğurla sınaqdan keçirməsinin Ukraynada istehsal olunan raket mühərriklərinin "qara bazar" vasitəsilə Şimali Koreyaya satılması nəticəsində mümkün olduğu iddia edilir.
"Soyuq müharibə" dövründən Rusiyanın ballistik raket proqramının əhəmiyyətli bir hissəsi olan və Ukraynada yerləşən raket istehsalı zavodundan gətirilən məhsulların ard-arda uğursuz sınaqlardan sonra Şimali Koreyanın necə müvəffəqiyyətli raket sınaqları keçirməyə başladığı sualının cavabı olduğu iddia edilir.
Əvvəllər ABŞ-ın Şimali Koreyaya qarşı kiberhücumlar və digər yollarla qarşısını almağa çalışdığı nüvə ticarətinin əsasən Çin üzərindən aparıldığı bildirilirdi. ABŞ prezidenti Tramp da Şimali Koreyanın iqtisadi və texnoloji dəstəkçisi kimi Çini göstərirdi.. Beynəlxalq Strateji Araşdırmalar Mərkəzinin raketlər üzrə mütəxəssisi Maykl Ellemanın yeni araşdırmasına görə, uğursuz sınaqların sonra son iki ildə Şimali Koreya tədarükçülərini dəyişdirib.
Şimali Koreya lideri Kim Çenin fotolarını araşdıran analitiklər yeni raket mühərriklərinin dizaynlarının bir vaxtlar Sovet İttifaqının raket arsenalının əsasını təşkil edən mənbədən əldə edildiyi nəticəsinə gəlib. Bu raket mühərrikləri 10 ədəd qitələrarası nüvə başlığını daşıya biləcək qədər böyük bir gücə sahibdir. Sözügedən mühərriklər yalnız bir neçə Sovet zavodunda istehsal edilirdi.
Ukraynada raket istehsalçısı "Yujmash" zavodu və "Cənub" konstruktor bürosu "Soyuq müharibə" dövründə SSRİ-nin SS-18 də daxil olmaqla ən güclü raketlərinin istehsal mərkəzi olub. Ukrayna müstəqilliyini qazandıqdan sonra da Rusiyanın əhəmiyyətli raket tədarük mərkəzlərindən biri kimi qalıb.
Elleman Birləşmiş Millətlər Təşkilatının araşdırmaçılarının altı il əvvəl Ukraynadakı raket kompleksindən reketlərin sirlərini oğurlamağa çalışan iki şimali koreyalını tutduqlarını deyir. İddialara görə, Ukrayna ilə Rusiya arasında gərgin vəziyyətdən yararlanan Pxenyan rəhbərliyi texnologiyanı buradan əldə etmək üçün son iki ildə ciddi fəaliyyət göstərib.
"Yujmash" isə sözügedən texnologiyaların Ukrayna xaricinə satılması ilə əlaqədar iddiaları keçən ay təkzib etmişdi.
Baki-xeber.com
