Ötən həftə sərt və hədələrlə dolu açıqlamalarla müharibənin bir addımlığına gələn ABŞ və Şimali Koreya arasında gərginlik dvam edir. Amerikanın milli təhlükəsizlik rəsmiləri Şimali Koreya ilə hərbi qarşıdurmanı istisna etmir və müharibə ehtimalının artdığını bildirirlər.
Baki-xeber.com xəbər verir ki, Mərkəzi Kəşfiyyat Agentliyinin (CIA) direktoru Mike Pompeo Şimali Koreyanın ABŞ-ı hədəf ala biləcək raketlər istehsal etməsini ciddi təhlükə adlandıraraq, administrasiyanın buna cavabsız qalmayacağını vurğulayıb. Pompeo Şimali Koreyanın nüvə sınaqlarına davam edə biləcəyini, ancaq Şimali Koreya ilə nüvə müharibəsi ərəfəsində olduqlarına dair əllərində kəşfiyyat məlumatı olmadığını deyib.
Şimali Koreyanın nüvə silahı əldə etmək üçün fəal işlədiyini ifadə edən Pompeo "Şimali Koreya nüvə silahı hazırlamağa yaxınlaşır. Təxminən 20 ildir ki, çalışırlar və buna yaxınlaşırlar" - deyib.
"Nüvə müharibəsinin astanasında olduğumuzu söyləyənləri eşitdim. Hazırda o nöqtədə olduğumuzu göstərən bir kəşfiyyat məlumatı yoxdur" - CIA direktoru bildirib.
Donald Trampın sərt sözlərinin Şimali Koreyaya nüvə silahı və ballistik raket texnologiyası ilə bağlı fəaliyyətlərinin xoş qarşılanmayacağı mesajını verdiyini deyən Pompeo ABŞ prezidentinin Şimali Koreya rejiminə müəyyən addımlara cəhd edərlərsə necə cavab veriləcəyini çox açıq şəkildə göstərdiyini xatırladıb.
Şimali Koreyanın nüvə silahı sınaqlarına davam edəcəyinə inandığını ifadə edən Pompeo bu ölkənin hər sınaqda təcrübəsini artırdığını deyib.
Bildiyiniz kimi, Şimali Koreya yalnızlaşdırılır. Çin də sanksiyalara qoşulub. Rəsmi Pekin də istəmir ki, ətrafında belə nüvə gücü olan dövlət olsun" - deyə o bildirib.
Trampın milli təhlükəsizlik məsələləri üzrə müşaviri H.R.Makmaster isə deyib ki, biz müharibəyə ötən həftə olduğu qədər yaxın deyilik, lakin ona bundan əvvəlki qədər yaxınıq.
O da xəbər verilir ki, Şimali Koreya lideri Kim Çen İn Çin, Rusiya və BMT-dəki nümayəndələrini geri çağırıb. Ehtimal edilir ki, söz duelindən sonra hər iki ölkə lideri bağlı qapılar arxasında planlar qurur. Şimali Koreya 3-cü kritik nümayəndəsini Pxenyana çağırıb. Şimali Koreyanın Çin, BMT və Rusiyadakı səfirləri də paytaxta çağırılıb. Diplomatlar saatlarla davam edən iclaslarda iştirak ediblər.
Pxenyanın rəsmi xəbər agentliyi bildirir ki, Şimali Koreya diplomatların paytaxta qayıtmasından sonra böyük bir iclas keçirib. İclas bir neçə saat davam edib.
Ehtimala görə, iclasda Şimali Koreyanın növbəti həmlələri və atacağı hərbi addımlar planlaşdırılır. İclasdan sonra Şimali Koreyanın yeni bir nüvə sınağı və raket hücumu haqqında planı olacağı iddia edilir.
Bu arada, ABŞ son 20 ildə Şimali Koreyadan 100 mindən artıq insanı viza ilə təmin edib. Təhliçilərin fikrincə, bu, Amerikanı, necə deyərlər, yataq agentləri baxımından təhlükəyə sala bilər. Belə hal keçmiş Sovet İttifaqından gələnlərlə də baş vermişdi.
Rəsmi diplomatik müdafiə olmadığına görə özlərini qanunsuz adlandıran agentlər saxta kimliklərlə çox vaxt mülki vəzifələrə sahib olur. Onlar ABŞ hökuməti, biznes elm kimi sahələrə yaxınlaşaraq, Rusiyanın kəşfiyyat orqanlarını iqtisadiyyatdan tutmuş müdafiəyə qədər müxtəlif məlumatlarla təmin edirdi.
Şimali koreyalılar xaricə çıxdıqda bir çox hallarda kəşfiyyat məlumatları toplayır. Koreya institutunun siyasi elmlər və beynəlxalq əlaqələr üzrə professoru Kim Byunk-kinin dediyinə görə, Amerikaya səfər ictimaiyyəti dərk etmək üçün mühüm bir səbəbdir. "Səfər onlara Amerikanın zövqü, siyasi və sosial baxışını öyrənmək üçün əhəmiyyətlidir. İnanıram ki, Sovet dövründə olduğu kimi, kəşfiyyat məlumatlarının toplanması da bura daxildir" - deyə Kim bildirib.
1997-2001- ci illər ərzində Şimali Koreyadan hər il 1200 şəxs biznes və turist vizaları ilə Amerikaya gedib. Onlardan bəziləri tələbə və diplomat statusları əldə edib. 9 nəfər isə iş icazəsi alıb.
Qeyd edək ki, son günlər tərəflərin bir-birinin ünvanına təhdid dolu mesajları daha çox müşahidə edilir. Bir neçə gün əvvəl isə ABŞ-ın Müdafiə Nazirliyi (Pentaqon) mətbuata Şimali Koreyanın 20-yə yaxın hərbi obyektinə qabaqlayıcı zərbələrin endirilməsi ilə bağlı planı olduğuna dair məlumat sızdırdı. Sızdırılan plandan belə aydın olur ki, Amerika hərbçiləri mümkün bombardmanda B-1B Lancer təyyarələrindən istifadə etməyi nəzərdə tutur. Quam adasındakı Andersen hərbi bazasında 6 belə təyyarə var. Mayın sonlarından etibarən hücumun imitasiyası məqsədilə 11 dəfə təlim uçuşları aparılıb. Hərbçilər bildirir ki, həqiqətən ABŞ KXDR-ə zərbə endirməli olsa, əməliyyatda kosmik peyklər, pilotsuz uçuş aparatları, qırıcı və kəşfiyyatçı təyyarələrdən istifadə olunacaq. Əsasən raketlərin buraxılması üçün istifadə olunan meydançalar, sınaq kompleksləri və köməkçi binalar hədəf olaraq seçiləcək. Amerika kəşfiyyatı obyektlərin dəqiq yerləri haqqında da məlumatlara malik olduğunu qeyd edib.
KXDR isə ABŞ-ın Quam adasındakı hərbi obyektinə ağır zərbə endirəcəyini bəyan edib. Şimali Koreyanın KCNA agentliyinin məlumatına görə, Koreya Xalq Ordusunun komandanlığı avqustun ortalarında Quam adasına endiriləcək zərbənin planı üzərində işi başa çatdıracaq. Plana görə, Şimali Koreya hərbçiləri ABŞ hərbi bazasına orta mənzilli dörd "Hwasong-12" ballistik raketini buraxmaq niyyətindədir. Raketlər Yaponiya üzərindən keçərək Quam adasının 30-40 km yaxınlığında suya düşməlidir. Rəsmi Pxenyan bu addımın ABŞ ordusunun Asiya və Sakit Okean regionunda qarşısının alınmasına yönəldiyini vurğulayıb. Şimali Koreya hərbçilərinin sözlərinə görə, "Hwasong-12" model 4 ədəd uzaqmənzilli ballistik raket eyni anda havaya qalxacaq və Yaponiyanın üstündən keçərək Quama doğru hərəkət edəcək. Raketlər 3.356 km məsafəni 17 dəqiqə 45 saniyəyə qət etdikdən sonra Quam adasına düşəcək..
Baki-xeber.com
