Bir müddətdir Koreya yarımadasında müşahidə edilən gərginlik hər an böyük bir müharibəyə çevrilə bilər. Artıq Şimali Koreya və ABŞ bir-birini açıq müharibə ilə təhdid etməyə başlayıb. Müşahidəçilərə görə, ard-arda raket sınaqları ilə vəziyyəti daha da gərginləşdirən Şimali Koreya və ABŞ bəlkə də ilk dəfə müharibəyə bu qədər yaxın görünür.
Qeyd edək ki, Şimali Koreyanın rəsmi xəbər agentliyi KCNA, Sakit Okeanındakı ABŞ-ın Quam adasına orta və uzaq mənzilli raket zərbələri endirmək üçün yeni plan hazırlandığını bəyan edib. Şimali Koreyanın Quam adalarını hədəf alan raketlərin "Hwasong-12" model olduğu bildirilir. Agentlik yazır ki, Şimali Koreya sözügedən qitələrarası ballistik raketlərin köməyi ilə ABŞ-ın Quam adasındakı hərbi bazalarını məhv etməyə qadir olması barədə Vaşinqtona ciddi siqnal ötürmək niyyətindədir.
ABŞ prezidenti Donald Tramp isə Şimali Koreyanı müharibə ilə təhdid edərək, prezidentlik kürsüsünə oturan kimi ilk əmrinin nüvə silahlarının yenilənməsi olduğunu xatırladıb.
"Prezident kimi ilk əmrim nüvə silahlarının yenilənməsi və modernləşdirilməsi oldu. Silahlarımız hazırda əvvəllər heç olmadığı qədər güclüdür. Ümid edirəm ki, bu gücü istifadə etməmizə heç bir zaman ehtiyac qalmaz. Ancaq əsla dünyada ən güclü xalq olmadığımız bir vaxt olmayacaq" - deyə Tramp bildirib.
ABŞ dövlət katibi Reks Tillerson isə, "Amerikan xalqı gecələri rahat yatmağa davam etsin. Şimali Koreyanın təhdidi heç nəyi dəyişməyəcək" - deyə bildirib.
Vaşinqtonun Şimali Koreyanın anlayacağı dildə danışacağını deyən Tillerson bildirib ki, Tramp Kim Jonqa onun anlaya biləcəyi bir dildə olduqca sərt mesaj göndərib.
Şimali Koreyadan gələn son təhdidlər Vaşinqtonla Pyonqyanq arasındakı gərginliyin artıq son həddə olduğunu göstərir. Dünyanı titrədən bu təhdidlər ABŞ prezidentinin iki gün əvvəl Şimali Koreya nüvə sınaqlarını davam etdirəcəyi halda buna sərt cavab verəcəklərini bəyan etməsilə başlayıb. Şimali Koreyanın Trampa cavabı isə daha sərt olub. Pyonqyanq rəhbərliyi ABŞ-a məxsus Quam adasını vurmaq üçün plan hazırladığını bəyan edib.
Qeyd edək ki, Quam adasında ABŞ-a məxsus "Andersen" aviabazası və "Apra-Xarbor" hərbi-dəniz bazası yerləşir. Quam valisi Eddie Kalvo isə buranın hərbi baza deyil, ABŞ torpağı olduğunu deyib: "Şimali Koreyanın təhdidlərinə boyun əyməyəcəyik".
Hadisələrin bu qədər gərgin olduğu bir vaxtda Şimali Koreyanın yarı rəsmi bir agentliyi qalmaqallı video paylaşıb. Videoda Şimali Koreya ordusu üç gündə Cənubi Koreyanı işğal edir. Sakit Okeandakı Quam adası ilə Yaponiyadakı ABŞ bazaları də qısa müddətdə məhv edilir.
Qeyd edək ki, qısa müddət əvvəl ABŞ-ın tələbilə toplanan BMT Təhlükəsizlik Şurası, nüvə proqramını dayandırmayan Şimali Koreyaya qarşı yeni sanksiyaların tətbiq etmişdi.
Bundan sonra "Washington Post" qəzetində çıxan xəbərdə Şimali Koreyanın bir raketin içinə yerləşdiriləcək qədər kiçik nüvə başlığı hazırladığı iddia olunub. Xəbərdə Şimali Koreyanın güman ediləndən daha qısa bir müddətdə ABŞ-ı vura bilmək qabiliyyətinə nail olacağı vurğulanır. ABŞ mediasının verdiyi məlumata əsasən, Müdafiə Nazirliyinin kəşfiyyat agentliyi keçən ay Pxenyanın dünyanın doqquzuncu tam nüvə qabiliyyətli ölkəsi olmaq səylərini inkişaf etdirərək, nüvə başlıqlarına malik olduğuna dair nəticə çıxarıb.
Şimali Koreya iyul ayında iki qitələrarası ballistik raket sınağı keçirib və ABŞ-ı vura biləcək qabiliyyətə çatdığını iddia edirdi. ABŞ prezidenti Tramp isə Şimali Koreyanın son sınaqlarına və açıqlamalarına cavab olaraq, "Şimali Koreya ABŞ-ı təhdid etməsə yaxşı olar. Dünyanın heç görmədiyi bir atəş və hirslə qarşı-qarşıya qalacaqlar" - deyib.
Baki-xeber.com
