"The Guardian" qəzetinin verdiyi məlumata görə, BMT 20,7 milyon yəmənlinin vəba xəstəliyinə tutula biləcəyini müəyyən etdikdən sonra xeyriyyəçi qurumdan "uşaqları xilas edək" çağırışı gəlib.
Yəməndə vəba xəstəliyinə tutulmaq ehtimalının yüksək olduğu ərazidə yaşı 5-dən aşağı olan 1 milyondan çox uşaq yaşayır. Buna görə də xeyriyyəçi qurum çərşənbə günü xəstəliyin ən çox yayıldığı və təhlükənin ən yüksək olduğu ərazilərə tibb ekspertləri göndərib.
Müşahidə və müayinələrdən əldə edilən cavablar nəticəsində məlum olub ki, 2015-ci ilin aprel ayından başlayan ölümcül vəba epidemiyasına 425000-dən çox insan yoluxub və onlardan təxminən 1900 nəfəri həyatını itirib. Xeyriyyə qurumu bildirib ki, 15 yaşın altındakı uşaqlar əhalinin ümumi sayının 44 faizini, son illərdə ölənlərin isə 32 faizini təşkil edir. Ümumiyyətlə isə, bu ölkədən vətəndaş müharibəsi və iqtisadi böhran nəticəsində də milyonlarla insan mühacirət edib.
"Uşaqları xilas edək" xeyriyyə qurumunun direktoru olan Tamer Kirolos deyib ki, burada faciə həm qidalanma, həm də vəba ilə bağlıdır:"Sağlamlıq qaydalarına əməl olunarsa, epidemiyaya yoluxanları müalicə etmək olar. Lakin ölkə ərazisində xəstəxanalar və klinikalar dağıdılıb, tibb işçilərinin maaşları bir ilə yaxındır ki, ödənilmir və bəzi bölgələrə həyati yardımların çatdırılması da dayandırılıb".
O deyib ki, vibrio vəba bakteriyası ilə çirklənmiş qida, yaxud su ilə yoluxan xəstələr müalicə edilmədikdə 1 saat ərzində həyatını itirə bilər.
Nəticədə vəba epidemiyası Birləşmiş Millətlər Təşkilatının humanitar qiymətləndirməsini keçən həftə yenidən nəzərdən keçirməsinə səbəb olub və məlum olub ki, 28 milyon əhalisi olan Yəməndə 20,7 milyonun köməyə ehtiyacı var.
"Oksfam" vəbaya yoluxmuş insan sayının 600000-dən çox ola biləcəyini proqnozlaşdırıb. Bu isə, 2011-ci ildə Haitidə qeydə alınan vəziyyət istisna olmaqla, 1 ildə heç bir ölkədə qeydə alınmamış ən yüksək rəqəmdir.
Rufanə SALEHQIZI
