ABŞ-ın Müdafiə Nazirliyi (Pentagon) nümayəndəsi Jeff Devis Türkiyənin Rusiyadan S-400 raketdən müdafiə sistemi almaq planlarından narahat olduqlarını və bu sistemin NATO-nun istifadə etdiyi digər donanmalara uyğun gəlməyəcəyini deyib.
Devis Washington-da keçirdiyi mətbuat konfransında "Ümumiyyətlə, müttəfiqlərin bir-birilə uyğunluq təşkil edən avadanlıq almasının yaxşı bir fikir olacağını düşünürük. Birlikdə çalışdığımız bütün müttəfiq və ortaqlarımızın NATO ittifaqını daha da irəliyə aparacaq şeylər satın almasını və bunlara sərmayə qoymasını istəyirik" deyib.
Təqribən 400 kilometrlik məsafədə hədəfi vuran S-400 raketdən müdafiə sistemi qurudan havaya atılan və düşmən təyyarələrinin vurularaq zərərsizləşdirilməsində istifadə olunur.
Hazırda əlində S-400 raketdən müdafiə sistemi olan NATO üzvü yoxdur.
Ancaq Yunanıstanda bir qədər əvvəlki versiya, Rusiya istehsalı olan S-300 raketləri var.
Yunanıstan bu raketləri NATO üzvü olmayan Cənubi Kiprdən almışdı.
Türkiyə ilə Rusiya bu ilin aprel ayında bu sistemi almaq istiqamətində apardıqları danışıqlarda əsas mərhələyə gəldiklərini açıqlamışdılar. Türkiyə prezidenti Recep Tayyip Erdoğan ötən həftə verdiyi açıqlamada S-400 raketlərinin satın alınması ilə bağlı sənədlərin imzalandığını söyləmişdi.
Türkiyə 2015-ci ildə Çinin qazandığı 3,4 milyard dollarlıq uzun məsafəli raket sistemi tenderini ləğv etmişdi. Türkiyə tarixinin ən böyük müdafiə tenderi olan bu satın alma cəhdi NATO-nun və ABŞ-ın narazılığına səbəb olmuşdu.
Mütəxəssislər NATO-nun bir-birinə inteqrasiya edən hava müdafiə sistemi olduğunu və Türkiyənin S-400 raketini satın almasının maliyyə, keyfiyyət və texnologiya transferi kimi bir çox texniki problemlər yaradacağını ifadə edir.
Bundan başqa, bu alış tamamlanacağı təqdirdə bunun Türkiyənin NATO ilə münasibətləri yenidən müəyyən etmək istiqamətində atdığı daha bir addım olaraq səciyyələndiriləcəyi də bildirilir.
