ABŞ Senatının prezident Donald Trampın Konqresdən icazə almadan sanksiyaları yumşaltmasına imkan verməyən qanunu təsdiq etməsinə Rusiya sərt reaksiya verib. Baki-xeber.com xəbər verir ki, Rusiya Xarici İşlər Nazirliyi ABŞ-a qarşı diplomat və mülklərin məhdudlaşdırılması barədə qərar verib.
Keçmiş ABŞ prezidenti Barak Obama dövründə 35 rusiyalı diplomatın deportasiya edilməsinə səssiz qalan Moskva indi buna adekvat reaksiya verərək, Moskvadakı amerikalı diplomatların sayını azaldır, Vaşinqtona isə vaxt verir.
Rusiyadakı ABŞ diplomatları və diplomatik nümayəndəliklərdəki texniki personalın sayının ABŞ-dakı rus diplomat və texniki işçi heyəti səviyyəsinə endirilməsini tələb edən Rusiya Xarici İşlər Nazirliyi ABŞ-a diplomatların sayını 455-ə qədər endirilməsi üçün sentyabrın 1-dək vaxt verib.
Rusiya, həmçinin, ABŞ-a aid bəzi mülklərə də əl qoyub. Xarici İşlər Nazirliyi Moskvadakı diplomatik nümayəndəliklərin ABŞ səfirliyi tərəfindən istifadə edilməsini dayandırıb. Açıqlamada qeyd edilir ki, Moskvadakı Dorojnaya prospektində yerləşən anbarlar və Serebryanıy Bordakı ABŞ səfirliyinə məxsus bağ evinin ABŞ səfirliyi tərəfindən istifadəsi 1 avqustdan etibarən dayandırılır.
Sözügedən mülklər Rusiya tərəfindən müsadirə olunacaq.
Nazirliyin açıqlamasında, Vaşinqton rəhbərliyi ABŞ-dakı Rusiya diplomatlarının sayını azaltmaqla bağlı yeni birtərəfli sanksiyalar tətbiq etməkdə davam edəcəyi halda, buna cavab veriləcəyi qeyd edilir.
"Amerika hakimiyyət orqanlarının bizim ABŞ-dakı diplomatlarımızın sayının azaldılacağına dair yeni birtərəfli addımları olacağı halda dərhal analoji addım atılacaq. Bu hadisələr bir daha ABŞ-ın beynəlxalq məsələlərdə kəskin aqressiv mövqe tutduğunu təsdiqləyir. Öz "müstəsnalığının" arxasında gizlənən ABŞ digər ölkələrin mövqeyini və maraqlarını inkar edir", - deyə Rusiya XİN-in açıqlamasında bildirilir.
"Interfax" xəbər agentliyi deportasiya ediləcək amerikalıların sayının onlarla deyil, yüzlərlə olduğunu yazır. Agentliyə məlumat verən mənbə diplomat və ya texniki heyətdən yüzlərlə adamın ABŞ-a dönmək məcburiyyətində qalacağını bildirib.
Kremlin sözçüsü Dmitri Peskov diplomatların qovulmasına münasibət bildirərkən Rusiya lideri Vladimir Putinin Rusiya Xarici İşlər Nazirliyinin açıqlamasını təsdiqlədiyini deyib. "Əlbəttə, bu cür tədbirlər prezidentin razılığı olmadan görülə bilməz"-deyə Peskov bildirib.
ABŞ Senatının Rusiyaya sanksiyaları nəzərdə tutan qanun layihəsini təsdiqləməsini dəyərləndirən Rusiya Federasiya Şurası İnformasiya Siyasəti Komissiyasının rəhbəri Aleksey Puşkov Senatın Moskvaya siyasi savaş açdığını deyib.
"Yeni sanksiyaları dəstəkləyən ABŞ Senatı sanksiyaların nəticələrindən narahatlıq keçirmədiyini göstərdi. Bu, hissiyyatını itirən böyük bir dövlətin siyasi savaş elanıdır" - deyə Puşkov bildirib.
Bu arada, Çin Xarici işlər Nazirliyi açıqlama yayaraq Rusiyanın ABŞ-a qarşı yeni sanksiyalarını dolayısı ilə dəstəkləyib. Nazirliyin sözçüsü Lu Kanq ABŞ Senatının Rusiya, Şimali Koreya və İrana qarşı sanksiya qərarını təsdiqləməsilə əlaqədar bütün ölkələrin problemlərini dostyana bir şəkildə həll etməsinin tərəfdarı olduğunu və Çinin birtərəfli sanksiyalara qarşı olduğunu bildirib.
O, Çinin, hansı səbəblə olursa-olsun, birtərəfli sanksiyaların əleyhinə olduğunu bəyan edib.
Rusiya mediası keçən həftə Moskvanın ABŞ diplomatlarını ölkədən çıxaracağını yazmışdı, son qərarın Rusiya xarici işlər nazirinin müavini Sergey Ryabkovun Vaşinqton səfərindən sonra veriləcəyini bildirmişdi.
Qeyd edək ki, yanvarın 20-də prezident kreslosunu Donald Trampa təhvil verən Barak Obama səlahiyyətlərinin başa çatmasına sayılı günlər qalmış 35 rus diplomatını casusluq ittihamı ilə deportasiya etmişdi. Eyni zamanda Rusiyaya məxsus 2 diplomatik xidmət binasına həbs qoyulmuşdu. Sözügedən dövrdə Rusiya prezidenti Vladimir Putin Obamanın bu addımına qarşılıq verməyəcəklərini, yeni rəhbərliyin addımlarını gözləyəcəklərini demişdi.
Bir neçə gün əvvəl isə ABŞ Senatı Rusiya, İran və Şimali Koreyaya qarşı sanksiyalar haqqında qanunu qəbul edib. Senatorların əksəriyyəti sənədi dəstəkləyib.
Bundan əvvəl ABŞ Konqresinin Nümayəndələr Palatası Rusiya, İran və Şimali Koreya əleyhinə sanksiyalar üzrə qanun layihəsini qəbul edib. Sənədi 419 konqresmen dəstəkləyib, 3 nəfər əleyhinə səs verib.
Səsvermənin nəticələri onu göstərir ki, prezident sənədi imzalamaqdan imtina edəcəyi təqdirdə (Senatın təsdiqindən sonra), Palata ölkə başçısının vetosunu qüvvədən salmaq iqtidarında olacaq.
Qəbul edilə biləcək yeni sanksiyalar 2014-cü ildən bu vaxtadək Rusiyaya qarşı tətbiq edilən sanksiyalar paketindən daha miqyaslı və kompleks şəkildə ola bilər.
Qanun layihəsində yer alan bəndlərdən biri sanksiyaları yumşaltmazdan və ya ləğv etməzdən əvvəl prezidenti bu cür qərarları qabaqcadan konqresmenlərlə razılaşdırmağa məcbur edir.
Vaşinqton uzun müddətdir Rusiyanın 8 noyabr 2016 seçkilərindəki rolunu araşdırır. ABŞ kəşfiyyat qurumları Moskva tərəfindən seçkilərə müdaxilə edildiyini dəfələrlə bəyan edib. Amerikan mətbuatının aylardır səhifələrinə daşıdığı xəbərlərə görə, Rusiya Demokratlar Partiyasının kompyuterlərinə müdaxilə etməklə Hillari Klintona qarşı Trampın namizədliyini dəstəkləyib.
Rusiya isə bütün bu iddiaları rədd edir. Mövzu Rusiya lideri Vladimir Putin və Donald Trampın ilk üz-üzə görüşündə də müzakirə edilib.
Tahir TAĞIYEV
