Gürcüstanın sabiq prezidenti və Odessanın sabiq qubernatoru Mixail Saakaşvili Ukrayna prezidenti Petro Poroşenkoya qarşı mübarizəni davam etdirmək üçün öz Ukrayna vətəndaşlığını bərpa etmək və Kiyevə qayıtmaq istəyir.
Ukrayna prezidenti Petro Poroşenko ötən gün onun ölkə vətəndaşlığından məhrum edilməsi barədə sərəncam imzalayıb.
Baki-xeber.com xəbər verir ki, "Sadə ukraynalının" video müraciətində Kiyev hakimiyyətinin köhnə tənqidçisi olan Saakaşvili, ölkədən qovulmasına səbəb müxalifətə keçməsi və etiraz nümayişlərinə hazırlanması olduğunu deyib. O Poroşenkonu demokratiyadan uzaqlaşmaqda və hakimiyyəti qəsb etmədə ittiham edib.
"Mənim isə yalnız bir vətəndaşlığım var- Ukrayna. Onu məndən almaq mümkün olmayacaq", Saakaşvili deyib.
Saakaşvili elan edib ki, qaçqın statusu almaq fikri yoxdur və özünü əksər hazırki deputatlardan daha çox ukraynalı sayır. «Ukraynada 13 ildən çoxdur ki, yaşayıram, 3 inqilabda iştirak etmişəm. Mənim yalnız bir vətəndaşlığım var – Ukrayna vətəndaşlığım və onlar məni bu vətəndaşlıqdan məhrum edə bilməyəcəklər» - deyə Saakaşvili bildirib.
Əlavə edib ki, qaçqın statusu almayacaq: «İndi məni məcbur etmək istəyirlər ki, qaçqın statusu alım. Bu, olmayacaq! Mən Ukraynaya qanuni qayıtmaq haqqım uğrunda mübarizə aparacam».
"Prezident Poroşenko Konstitusiyaya tüpürüb... Bu, Ukrayna cəmiyyətinə birbaşa və birmənalı siqnaldır- daha demokratiyada heç bir oyun olmayacaq", deyə Saakaşvili bildirib.
"Elə ki onlar başa düşdülər ki, biz (müxalifət) payızda küçələrə çıxmaq və cinayətkarlar arasında sövdələşməyə son qoymaq üçün birləşirik, qorxu sağlam düşüncəyə qalib gəldi", Saakaşvili Facebook sosial şəbəkəsində yazıb.
Bu arada Kiyevdə 400-ə yaxın etirazçı aksiya keçirib. Mixeil Saakaşvilinin Ukrayna vətəndaşlığından məhrum edilməsinə etiraz edənlər Müstəqillik meydanına toplaşıblar. Aksiya iştirakçıları əllərində heç bir partiya bayrağı tutmayıblar. Fəallar deyirlər ki, konkret hansısa siyasətçiyə görə yox, sadəcə «hakimiyyətin özbaşnalığına qarşı» çıxırlar. Etirazçılar arasında düşünənlər var ki, bundan sonra hakimiyyət daha irəli gedə və digər müxalif siyasətçilərin də Ukrayna vətəndaşlığını ləğv edə bilər.
Poroşenkonun Saakaşvilini ölkə vətəndaşlığından məhrum etməsi barədə Ukrayna dövlət miqrasiya xidmətinin saytında məlumat verilib. Xəbərə görə, buna səbəb kimi Saakaşvilinin Xidmətdə anket doldurarkən oraya yalan məlumatlar daxil etməsi göstərilir. “Anketdə Saakaşvili barəsində məhkəmə hökmünün olmadığını göstərir, halbuki, Gürcüstanda o, qiyabi şəkildə həbs olunub”- sənəddə deyilir.
Miqrasiya Xidmətində bildiriblər ki, Saakaşvili barəsində araşdırmalara xalq deputatı Andrey Lozovoyun Prokurorluğa müraciətindən sonra başlanıb.
"Prezident tərəfindən Ukrayna vətəndaşlığının itirilməsi barədə göstəriş verilib. Ukrayna Dövlət Miqrasiya Xidməti tərəfindən Saakaşvili haqqında hazırlanan materiallar Baş Prokurorluğa təqdim edilib. Daha sonra Ukrayna prezidenti yanında vətəndaş məsələləri üzrə komissiya təyin olunmuş qaydalar üzrə komissiyanın iclasında məsələni müzakirə edib",- deyə məlumatda bildirilir.
Ötən ilin payızında qubernator postunu tərk edən siyasətçi, Petro Poroşenkonu kəskin tənqid etmişdi. Vətənində ona qarşı cinayət işi qaldırılıb.
"Bunun doğru olduğunu mənə təsdiqləyiblər", -deyə Ukrayna parlamentinin deputatı, Radikal Partiyanı təmsil edən İqor Mosiyçuk Facebook səhifəsində yazıb.
"Saakaşvilini vətəndaşlıqdan məhrum ediblər və bu da onu sübut edir ki, prezident Poroşenko nəhayət öz səhvlərini etiraf etməyə başlayıb" deyə o bildirib.
Poroşenko 2015-ci ilin mayın 30-da Saakaşviliyə Ukrayna vətəndaşlığı verilməsi barədə sərəncam imzalayaraq, həmin gün onu Odessa vilayətinin başçısı təyin etmişdi. Odessa qubernatoru postunda olan Saakaşvili yerli nümayəndələrlə münaqişə edərək, o cümlədən Poroşenko administrasiyasının ünvanına da kəskin bəyanatlarla çıxış edirdi. O, prezidentin ətrafını rüşvətxorluqda ittiham edirdi.
Ötən ilin noyabr ayında Gürcüstanın keçmiş prezidenti qubernator postundan istefa verdiyini bəyan etdi. Poroşenko iki gün sonra onun istefasının qəbul olunması barədə sərəncam imzaladı.
Saakaşvili həmçinin Ukrayna prezidentinin ştatdankənar müşavir postundan da kənarlaşdırıldı.
"Odessa yalnız Kiyev rüşvətxorlardan azad olunacağı təqdirdə inkişaf edəcək. Ona görə də mən bu vəziyyətdə istefa verməyə və yeni mübarizə mərhələsinə başlamağa qərar verdim ", - deyə Saakaşvili bildirmişdi.
Saakaşvili 2008-2013-cü illər arasında Gürcüstanın prezidenti olub. Daha sonra seçkilərdə məğlub olan Saakaşvili Ukraynaya üz tutub. Gürcüstan rəhbərliyi Saakaşvilinin təhvil verilməsinə çalışırdılar. Vətənində ona qarşı bir neçə cinayət işi qaldırılıb.
İyulun 25-də Saakaşvili Facebook səhifəsində ABŞ-da olduğunu yazıb.
Ukrayna Ali Radasının deputatı, Petro Poroşenkonun blokunun təmsilçisi Serqey Lişenkonun fikrincə, Saakaşvilinin vətəndaşlıqdan məhrum edilməsi onun Ukraynaya qayıtmasına mane olmalıdır.
"Poroşenkonun Saakaşvili barədə ssenarisi: ABŞ-da olarkən onu Ukrayna vətəndaşlığından məhrum etmək. Belə olan təqdirdə Saakaşvili fiziki olaraq Ukraynaya qayıda bilməz. Kiyevin Borispol hava limanında saxlanılacaq Saakaşvili ilk reyslə Gürcüstana ekstradasiya ediləcək. Faktiki olaraq Saakaşvilini Ameriakadan sığınacaq istəməyə və Ukrayna siyasətini unutmağa vadar edirlər", - deyə Lişenko Facebook-da yazıb.
