Vaşinqton rusiyapərəst üsyançıların müqavimətini qırmaq üşün Ukraynaya silah göndərilməsini fəal şəkildə nəzərdən keçirir. Baki-xeber.com xəbər verir ki, bu bunu ABŞ-ın Ukraynadakı yeni xüsusi nümayəndəsi Kurt Volker deyir.
Kurt Volker BBC-ə açıqlamasında sözügedən yardımla Kiyev rəhbərliyinə bağlı qüvvələrin Moskvanın irəliləyişini dəyişdirəcəyini deyib: “Ukrayna hökumət qüvvələrinin silahlandırılması Moskvanın yanaşmasını dəyişə bilər”.
Volker sözlərinə görə, ukraynalılara özlərini müdafiə etmək üçün müdafiə silahları verilə bilər və bunlar arasında tanklar da ola bilər.
Rusiya sərhədinə silah göndərilməsi qərarının rəsmi Moskvanı aqressivləşdirə biləcəyini qeyd edən xüsusi nümayəndə, eyni zamanda bunun ukraynalıları cəsarətləndirə biləcəyini də deyib.
Kurt Volker, Ukraynanın şərqində sülhü təmin etmək üçün Rusiyaya yeni bir strateji dialoq çağırışı da edib.
Kremlin sözçüsü Dmitri Peskov isə, ABŞ Ukraynaya öldürücü silahlar göndərəcəyi halda, bunun sülh səylərinə zərər verəcəyini və gərginliyi artıracağını deyib: "Əvvəllər də bir neçə dəfə dilə gətirdiyimiz kimi, gərginliyi yüksəldəcək və vəziyyəti daha kompleks hala gətirəcək hərəkətlər, bizləri Ukrayna böhranının həllindən uzaqlaşdıracaq".
Qeyd edək ki, BMT-nin məlumatına görə, 2014-cü ilin aprelində şərqi Ukraynada münaqişə başladıqdan bir qədər sonra Rusiyanın Krım yarımadasını ilhaq etməsindən bəri 10,000 nəfərdən çox insan həlak olub. Döyüşlərdə 1.6 milyondan artıq insan köçkün vəziyyətə düşüb.
2015-ci ilin fevralında Minskdə atəşkəs imzalanıb, amma onun şərtlərinə heç də hər zaman əməl edilmir.
