Türkiyə ictimaiyyəti ABŞ-ı ən böyük təhdid, Azərbaycanı isə ən yaxın dost görür. Baki-xeber.com xəbər verir ki, bu barədə Türkiyə Kadir Has Universitetinin keçirdiyi sorğunun nəticələri əsasında hazırlanmış hesabatda bildirilir.
İyun ayı ərzində 26 bölgədə, min nəfər arasında keçirilən sorğunun nəticələri əsasında hazırlanan hesabatda ictimaiyyətin Türkiyənin aktual xarici siyasət məsələlərinə baxışı, təklif və dəyərləndirmələri yer alır.
Hesabata görə, Türkiyənin ən yaxın dostu Azərbaycandır. Keçən il sorğu iştirakçılarının 59,3 faizi Azərbaycanı ən yaxın dost ölkə kimi xarakterizə edib. Ancaq bu il bu rəqəm 12 faiz artıb, sorğuya qatılanların 71,3 faizi Türkiyənin ən yaxın dostunun Azərbaycan olduğunu ifadə edib.
Kadir Has Universitetinin rektoru prof. Dr. Mustafa Aydın bildirir ki, Türkiyənin ən yaxın dostu hansıdır sualında onsuz da hər zaman Azərbaycan birinci sırada yer alırdı: “Lakin bu il 70 faizlə çox-çox dəqiq şəkildə Azərbaycan çıxdı. Yəni Azərbaycandan başqa ikinci bir ölkə dost görünmür”.
Azərbaycanı 2.2 faizlə Pakistan və Qətər (1.9 faiz) izləyir. KKTC-nin Türkiyənin ən yaxın dostu olduğunu düşünənlər isə 1.8 faiz təşkil edir.
Türkiyəyə təhdid kimi görülən ölkələr variantında isə keçən il Yaxın Şərq ölkələrini bu il ABŞ əvəz edir. Sorğu iştirakçıları keçən illə müqayisədə 22,4 faizlik artımla bu il ABŞ-ı Türkiyə üçün ən böyük təhdid görür.
M.Aydının sözlərinə görə, bunun arxasında Suriyada olanlar, ABŞ-ın PYD-yə verdiyi silah dəstəyi və Türkiyənin Suriyadakı siyasətinə zidd mövqe sərgiləməsi dayanır.
Bu sırada ikinci yeri 37,4 faizlə İsrail üçüncü yeri isə Avropa Birliyi (AB) tutur. Keçən il iştirakçıların 10,4 faizi AB-ni təhdid kimi gördüyü halda, bu il sorğu iştirakçılarının 24 faizi birliyi Türkiyə üçün üçüncü böyük təhdid kimi gördüyünü bildirib.
Rusiyanı təhdid kimi görənlər isə 34,9 faizdən 18,5 faizə düşüb.
