"The Guardian" qəzetinin verdiyi məlumata görə, son zamanlar iranlı qadınlar avtomobillərdə hicab qaydalarını yox etmək barədə müzakirələr aparırlar.
Qəzetin yazdığına görə, İranda avtomobil sürən zaman hicab geyinməkdən imtina edən qadınların sayı hər keçən gün artır. Ümummilli müzakirələrə qoşulanlar bu təşəbbüsü onunla izəh edirlər ki, avtomobil şəxsi məkandır və onlar burada daha sərbəst geyimdə ola bilərlər.
Bəllidir ki, 1979-cu il çevrilişindən sonra məcburi hicab geyimi İslam dövlətinin daxili siyasətinin bir hissəsini təşkil edib, lakin hazırda bir çox iranlı qadın artıq bu sərhədləri yıxmağa başlayıb. Tehrandakı müşahidəçilər deyirlər ki, həzırda avtomobil sürən qadınlar hicabı çiyinlərində saxlayır və bu da oxşar görünüş yaradır.
Əxlaq polisi ilə qadınlar arasında bu mövzuda qarşıdurma isə yayda, temperaturun yüksəldiyi vaxtda daha da artır. Baxmayaraq ki, polis bu vəziyyətdə maşın sürənləri saxlayır, yaxud müvəqqəti olaraq nəqliyyat vasitələrinə əl qoyur, yenə də polisə müqavimət davam edir.
Maraqlıdır ki, İranın mülayim prezidenti Həsən Ruhani insanların şəxsi məkanlarına hörmət edilməsi fikrini müdafiə edir və hicab geyinməyən qadınlar üzərindəki təzyiqə qarşı çıxır. O,açıq şəkildə bildirir ki, İranı idarə etmək polisin vəzifəsi deyil. 2015-ci ildəki çıxışında Ruhani deyib ki, mən bunu edirəm, çünki Allah belə buyurub. Polis isə buna qarışa bilməz, bu polisin işi deyil.
Əslində bir çox iranlı bu fikirdədir ki, şəxsi məkanlara aid qaydalar həm də avtomobillərə aiddir, lakin hakimiyyət orqanları və polis buna qarşı çıxır. İranlı məmur Hadi Sədəqi iəs məsələ ilə bağlı ötən həftə verdiyi açıqlamada bildirib ki, avtomobilin görünməyən hissələri, məsələn gövdə şəxsi məkandır, lakin bu, avtomobilin görünən hissələrinə aid deyil. Onun sözləri internetdə böyük reaksiyaya səbəb olub. Sosial media istifadəçilərdən biri buna cavab olaraq avtomobil baqajında oturan cütlüyün karikaturasını paylaşıb. Digər bir istifadəçi isə belə bir yazı paylaşıb:"Polis deyir ki, təkcə baqaj şəxsi məkandır, onda belə çıxır ki, maşını baqajsız olan kasıbların, yəni bizim heç bir şəxsi məkanımız yoxdur".
Yerli media isə məcburi hicabı açıq tənqid edir. Hətta dövlət xəbər agentlikləri də bu barədə bir çox məqalələr dərc edir. Hakim Hüseyin Əhmədinaz mediaya müsahibəsində bildirib ki, insanların şəxsi məkanlarına qarışmaq onların vətəndaşlıq hüquqlarının pozulmasına bənzəyir və bu məsələ parlamentdə qaldırılmalıdır, polislə müzakirə olunmalı deyil. O deyib:"Qanunlar bəyan edir ki, avtomobilin daxili şəxsi məkandır, həmçinin vətəndaş hüquqları ilə bağlı nizamnamədə avtomobilin daxilinin şəxsi məkan olaraq qəbul edildiyi və vəzifəli şəxslərin buna hormətlə yanaşmalı olduğu bildirilir". İran polisinin sözçüsü Səid Montazerələhmədi isə bu deyilənlərlə razılaşmayaraq, gözlə görünən bir məkanın şəxsi ola bilməyəcəyi və cəmiyyətə aid bütün qanunların avtomobilin daxilində də keçərli olduğu fikrində israr edir.
RUFANƏ
