Rusiya, ABŞ sanksiyalarına cavab olaraq, təxminən 30 ABŞ diplomatını ölkədən xaric edib, ölkəsində ABŞ-a aid əmlakları müsadirə etməyə hazırlaşır. Baki-xeber.com BBC-yə istinadən xəbər verir ki, bunu Rusiya rəsmiləri deyib.
"İzvestiya" qəzetinin məlumatına görə, bu xəbərdarlıq Rusiya Xarici İşlər Nazirliyində yerləşən mənbələrdən gəlib. Son zamanlar digər Rusiya rəsmiləri də bənzər xəbərdarlıqlar səsləndiriblər.
Qeyd edək ki, dekabr ayında Obama administrasiyası 35 Rusiya diplomatını arzuolunmaz şəxs elan edərək ABŞ-dan xaric etmişdi. Eyni zamanda ABŞ-da yerləşən 2 kəşfiyyat mərkəzini bağlatmışdı. Bu addımlar Rusiyanın ABŞ-dakı prezident seçkilərinə iddia olunan müdaxiləsinə cavab kimi təqdim edilmişdi. Bundan əvvəl də ABŞ Rusiyaya qarşı sanksiyalar tətbiq etmişdi.
O zaman ABŞ kəşfiyyatı Hillari Klintonun prezident kampaniyasını zəiflətmək üçün Demokratlar partiyasına qarşı haker hücumunun arxasında Rusiyanın olduğunu iddia etmişdi. Sabiq ABŞ prezidenti Barak Obama bu məlumatı aldıqdan sonra Rusiyaya qarşı tədbirlər həyata keçirmək qərarı vermişdi.
"İzvestiya" yazır ki, Rusiya prezidenti Vladimir Putin Obama dövründən qalmış sanksiyalar barədə ABŞ Prezidenti Donald Trampa iyulun 7-si Hamburq şəhərində keçirilən görüşdə şikayət edib.
