Şimali Koreya Yaponiyaya doğru ballistik raket atıb. Ballistik raket 40 dəqiqəyədək uçub. Bu ilk dəfədir ki, Şimali Koreya ABŞ ərazisinə çata biləcək qitələrarası ballistik raket sınağının uğurla başa çatdığını iddia edir. Raketin uçduğu məsafə əvvəlki sınaqlarda olduğundan daha uzaqdır.
Əgər Şimali Koreyanın iddiaları doğrudursa, o zaman bu raket, Alyaskanı hədəfə alacaq gücdədir və bu vəziyət prezident Donald Trampa, Şimali Koreyaya cavab verməsi üçün təzyiqləri artıracaq. Bundan öncə Tramp demişdi ki, Pxenyan ABŞ-ı vuracaq gücə malik raket istehsal edə bilməz.
Bu gün sınaq barədə xəbərlərdən sonra Tramp Çini bu "cəfəngiyyata birdəfəlik son qoymağa" çağırıb.
“Hwasong-14” raketinin buraxılmasını Şimali Koreya lideri Kim Jongun özü də izləyib. Cənubi Koreya bəyan edib ki, səhər saatlarında buraxılan raket təxminən 40 dəqiqə ərzində 930 kilometr məsafəni qət edib. ABŞ-ın Sakit okean komandanlığı raketin ortamənzilli olduğunu bildirir.
Şimali Koreya son zamanlar həyata keçirdiyi sınaqların sayını artırıb. Bu, bölgədə gərginliyin kəskinləşməsinə səbəb olub. Pxenyan tərəqqiyə nail olsa da, ballistik raketlərin dəqiqliklə hədəfə çatdırılması texnologiyasına malik deyil. O, həmçinin nüvə başlığını raketə yerləşdirmək üçün kifayət qədər kiçiltməyə qadir deyil.
Ekspertlər hesab edir ki, raket Alyaskaya çata bilsə də, cənubdakı ştatlar onun hədəf radiusu kənarında qalır. "Xəbərlər düzgündürsə, həmin raketin standart trayektoriya ilə uçuş məsafəsi 6,700 km çata bilər", - Union of Concerned Scientists qrupundan fizik Devid Rayt bildirir.
O hesab edi rki, bu məsafə, raketin 48 ştat və Havayın iri adalarına çatması üçün kifayət etmir. Lakin o Alyaskaya çata bilər.
Şimali Koreyaya yalnız raket lazım deyil. O, həmçinin atmosferə yenidən daxil olan raketin nüvə başlığının qorunmasını təmin etməlidir.
Yanvar ayında prezident Tramp Şimali Koreyanın ABŞ-a zərbə endirməyə qadir olmadığını deyib. Ancaq həqiqət budur ki, bu baş verə bilər. Bir sıra ekspert hesab edir ki, Şimali Koreya buna beş il və bəlkə də daha qısa müddət ərzində nail ola bilər.
Qitələrarası ballistik raket (QABR) adətən nüvə başlığı daşıyan uzaq mənzilli raketdir.
Raketin ən aşağı uçuş məsafəsi 5500 kilometrdir, hərçənd ki, onların çoxu 10000 və daha artıq məsafələri qət edə bilər.
Pxenyan QABR raketlərinin iki növünü nümayiş etdirib: Bunlar 11500 km məsafəli KN-08 və 10000 km məsafəli KN-14 raketləridir. Lakin 4 iyuladək onların uçuş sınağından keçirildiyi açıqlanmayıb.
Pxenyanın ikinci çətinliyi QABR raketlərinə yerləşəcək kiçik ölçülü nüvə başlığının hazırlanmasıdır.
