İran bu səhər bir hücum dalğası sarsıldı. Məclis binası və Ayətullah Xomeyni türbəsində üç canlı bomba özünü partladıb. Baki-xeber.com xəbər verir ki, Məclisə “Kalaşniko”larla girən terrorçularla polis arasında bir neçə saat davam edən atışma olub. Ən az 12 nəfərin öldüyü və çox sayda adamın yaralandığı hücumları terror təşkilatı İŞİD üzərinə götürüb. Son bir neçə aydır Tehranı təhdid edən terror təşkilatı, İranda ilk dəfə hücum təşkil edib. Səhər saatlarında ilk olaraq paytaxt Tehrandakı Məclis binasında silah səsləri eşidilib. Məclisə iki Kalaşnikov və bir tapança ilə girən üç terrorçu atəş açmağa başlayıb. Bir terrorçunun dörd nəfəri girov götürdüyü bildirilir. Polis Məclis binasındakı bir uşağı səssizcə pəncərədən çıxarmağı bacarıb.
Daha sonra girovları əlində saxlayan terrorçu özünü partladıb. Bir canlı bomba isə polis tərəfindən sağ ələ keçirilib. “Fars” xəbər agentliyi, bir terrorçunun binadan çıxmağı bacardığını və qaçarkən tutulduğunu xəbər verir.
Məclisdəki millət vəkillərinin binadan evakuasiya edildiyi bildirilir, ancaq bu məlumat hələ rəsmi təsdiqlənməyib.
Günorta saatlarında dörd terrorçu öldürülüb və Məclisdəki girovların azad edilməsi əməliyyatı başa çatıb.
İran Daxili İşlər Nazirliyi terrorçuların əsas giriş qapısından qadın paltarında girdiyini açıqlayıb.
Məclisdəki hücumdan dəqiqələr sonra bu dəfə Tehranın cənubundakı Ayətullah Xomeyni türbəsinə hücum olub. Bir canlı bomba burada özünü partladıb. Onun qadın olduğu bildirilir. Bundan qısa müddət sonra ikinci terrorçu da türbədə özünü partladıb.
Türbəyə hücum edənlərdən biri isə zəhərli maddə içərək intihar edib. Polis üzərində kamikadze kəməri olan olan bir başqa terrorçunu saxlayıb. Türbəyə hücumda çox sayda adamın yaralandığı bildirilir.
İran rəsmiləri verdikləri ilk açıqlamada hücumların arxasında terror təşkilatı İŞİD-in olduğunu bildiriblər. Bu açıqlamalardan qısa müddət sonra, İŞİD hücumlara görə məsuliyyəti öz üzərinə götürüb.
BBC, İranda 1979-cu ildəki İslam İnqilabından sonra ilk dəfə Məclisin hədəf alındığını bildirir.
