Avropa ilə ABŞ arasında son vaxtlar müşahidə edilən gərginlik daha da artır. Baki-xeber.com xarici KİV-ə istinadən xəbər verir ki, Almaniya Baş naziri Angela Merkelin G7 zirvəsindəki açıqlamalarına sərt cavab verən ABŞ prezidenti Donald Tramp geri addım atmaq niyyətində deyil.
ABŞ lideri, Twitter hesabından "Almaniya ilə nəhəng ticarət açığımız var, bir də NATO-ya lazım olan ödənişləri etmirlər. Bu ABŞ üçün çox pisdir, bu dəyişəcək" deyə yazıb.
Tramp bu mesajı, Merkelin Hindistanda "Biz Avropada taleyimizi öz əllərimizə almalıyıq" bəyanatından bir neçə dəqiqə sonra verib.
ABŞ liderinin sözləri Almaniyada şok effekti yaradıb. Sosial Demokrat Partiyasından (SPD) Tomas Oppermanna görə, Trampın son mesajı ilə Almaniyanı siyasi rəqib kimi gördüyünə açıq işarə edir.
Almaniya xarici işlər naziri Ziqmar Qabriel isə Tramp rəhbərliyini tənqid edərək, ABŞ-ın Qərb dünyasının lider gücü statusunu itirdiyini bəyan edib. Qabriel ABŞ-ın Qərb birliyindəki əsas güc kimi iflasına işarə edərək, Ağ Evin siyasətinə qarşı çıxmaqla bağlı çağırışlar edib.
Nazirin fikrincə, Vaşinqtonun hazırda yeritdiyi siyasət dünyaya mənfi təsir göstərir.
Trampın hakimiyyətə gəlişi ilə beynəlxalq arenada qüvvələr balansı dəyişdiyini deyən alman nazir Qərbin kiçildiyini, ABŞ-ın dünya lideri statusundan məhrum olduğunu ifadə edib.
Z.Qabriel həmçinin yeni Vaşinqton administrasiyasının miqrasiya məsələləri və iqlim dəyişikliyinə dair mövqeyini tənqid edib. Onun fikrincə, bu sahədə Ağ Evin təşəbbüsləri mövcud problemləri daha da dərinləşdirir.
Almaniya mətbuatı yazır ki, ABŞ-la müşahidə edilən soyuq münasibətlər fonunda Merkel bir tərəfdən də, ictimaiyyəti Avropa Birliyi daxilində gözlənilən yeni islahatlara hazırlayır. Merkelin son çıxışları da Avropanın yenidən qurulmasının başlanğıcı kimi də dəyərləndirilir.
Qeyd edək ki, ötən həftə G7 zirvəsində Avropa və ABŞ arasındakı fikir ayrılıqları açıq üzə çıxmışdı. Başqa ölkələrə güvənə biləcək dövrün geridə qaldığını ifadə edən Almaniya lideri Merkel, Avropanın taleyini əlinə almasının vaxtının çatdığını deyib: "Başqalarına tamamilə güvənə biləcəyimiz dövrlər geridə qaldı. Bunu son günlərdə yaşadım. Ancaq biz avropalılar olaraq öz gələcəyimiz üçün özümüzün mübarizə aparmağımızın vacibliyini bilməliyik”.
