Tramp: “ABŞ PKK və İŞİD-lə mübarizədə Türkiyəni dəstəkləyir”
Donald Trump PKK və İŞİD kimi terror qrupları ilə mübarizədə ABŞ Türkiyəni dəstəklədiyini bildirib. APA-nın “Sputnik”ə istinadən verdiyi xəbərə görə, bunu ABŞ prezidenti Donald Trump türkiyəli həmkarı Rəcəb Tayyib Ərdoğanla Vaşinqtonda keçirdiyi görüşdən sonra birgə mətbuat konfransında bildirib.
“Bu gün biz yeni düşmənlə üzləşmişik və onunla birlikdə mübarizə aparmalıyıq. Biz son vaxtlar bir çox terror hücumları ilə üzləşmişik, biz birlikdəyik və Türkiyə xalqına dəstəyimizi təklif edirik. Biz terrorla mübarizədə öndə gedən, İŞİD və PKK kimi terror qruplaşmaları ilə mübarizə aparan Türkiyəni dəstəkləyirik”, - deyə Tramp qeyd edib.
Ərdoğan ABŞ-ı Yaxın Şərq regionunda əməkdaşlığa çağırıb və bunun bütün dünya üçün çox əhəmiyyətli olduğunu vurğulayıb.
O, Ankaranın Vaşinqtonla əlaqələri daha da genişləndirmək niyyətində olduğunu qeyd edib.
“Ankara Suriyadakı münaqişənin nizamlanması prosesində PKK-nın Suriya qolu olan PYD/YPG terror qruplaşmalarının maraqlarını nəzərə almaq niyyətində deyil”. Bunu Türkiyə prezidenti Rəcəb Tayyip Ərdoğan deyib.
“Türkiyə PYD/YPG-nin bölgədəki maraqlarını heç vaxt nəzərə almayacaq. Bu əldə etdiyimiz qlobal sazişə ziddir. Biz, bu qruplaşmaların terror vasitəsilə bölgənin dini və etnik quruluşunu manipulyasiya etməsinə imkan verməməliyik”, - deyə Ərdoğan Vaşinqtonda ABŞ prezidenti Donld Trampla görüşündən sonra bildirib.
Ərdoğan bəyanatı türk dilində səsləndirib. ABŞ telekanalları bəyanatı ingilis dilinə tərcümə edərək yayımlayıblar.
Ərdoğan bildirib ki, Ankara və Vaşinqton Suriya və İraqda birgə addımların variantlarını nəzərdən keçirirlər. “Biz Suriya və İraqda göstərə biləcəyimiz ümumi səyləri nəzərdən keçiririk”, - deyə Ərdoğan bildirib. Türkiyə lideri qeyd etdiyi səylərin mahiyyətini açıqlamayıb.
Qeyd edək ki, ABŞ bundan əvvəl Türkiyə Silahlı Qüvvələrinin terrorçuların İraq ərazisindəki mövqelərinə zərbələr endirməsinə etiraz edib. Vaşinqton iddia edir ki, bu cür zərbələr rəsmi Bağdadla razılaşdırılmalıdır.
Rəsmi Ankara isə, öz növbəsində, ABŞ-ın Suriyadakı PYD/YPG kürd terror qruplaşmalarına dəstək verməsinə dəfələrlə etirazını bildirib.
