Koreya Yarımadasında gərginliyin yüksəldiyi bir vaxtda daha bir tarixi həmlə Yaponiyadan gəlib. Ölkənin ən böyük döyüş gəmisi “Izumo” Yokosuka bazasından ayrılaraq okeana çıxıb.
Baki-xeber.com xəbər verir ki, II Dünya Müharibəsinin məğlublarından olan Yaponiya, konstitusiya gərəyi 1945-ci ildən bu yana ölkə sərhədlərindən kənarda heç bir hərbi əməliyyata qoşulmurdu. Ancaq iki il əvvəl qanunların dəyişməsilə, 72 ildən sonra ilk dəfə ən böyük döyüş gəmisi ölkə sərhədlərindən kənarda hərbi missiya yerinə yetirmək üçün yola çıxıb.
Doqquz helikopter daşıya bilən 249 metr uzunluğundakı “Izumo” ABŞ-ın Koreya sahillərində olan “USS Carl Vinson” təyyarə gəmisi və digər döyüş gəmilərinə qatılacaq. Məlumatlara görə, yapon gəmisi “USS Carl Vinson”ı qoruyacaq.
ABŞ-ın döyüş gəmilərindən əlavə “USS Michigan” adlı nüvə sualtı gəmisi də bölgədədir.
Cənubi Koreya şənbə günü ABŞ hücum donanmasının manevrə başladığını bəyan edib.
Qeyd edək ki, Koreya Yarımadasında aprelin əvvəlindən gərginlik səngimir. ABŞ-ın “USS Carl Vinson”ın da aralarında olduğu böyük hərbi donanmanı bölgəyə göndərəcəyini bəyan etməsindən sonra tərəflərin bir-birinə qarşı nüvə təhdidləri də yüksəlməyə başladı.
Şimali Koreya ABŞ-ın “USS Carl Vinson” və digər döyüş gəmilərini batırmaqla təhdid edir. Son olaraq onlar ABŞ-ın nüvə sualtı gəmisini də su üzünə çıxmamış “yox edə biləcəklərini” bəyan ediblər.
Vaşinqton isə, Kim Jonqu həm iqtisadi sanksiyalar, həm də müttəfiqi Çinin üstündən sıxışdırmağa çalışır. Böhran başlayandan indiyə kimi Çinə təzyiq edən ABŞ, hələlik bir nəticə əldə edə bilməsə də, ola biləcək bir müharibədən də çəkinir. ABŞ prezidenti Donald Tramp, müharibə başlayarsa milyonlarla adamın ölə biləcəyilə bağlı xəbərdarlıq edib.
ABŞ-ın kəşfiyyat mütəxəssisləri Şimali Koreyaya qarşı hərbi əməliyyatların böyük risqlər daşıdığını deyir: “Anidən raket, ya da nüvə obyektlərinin vurulması, tək başına Şimali Koreyanın bütün hərbi obyektlərini məhv etmək mümkün deyil. Belə bir hərəkət, Şimali Koreya lideri Kimin Cənubi Koreya və ya Yaponiyanı vurmasına səbəb ola bilər”.
Amerika bazasının olduğu Yokotada yaşayan yaponlar da bölgənin hədəf ola biləcəyindən narahatdır.
Raket texnologiyaları mütəxəssisi Con Şilinqə görə, Şimali Koreyanın sərhədə 21 mindən çox artilleriya və raket qurğuları var. Sözügedən silahlar, Cənubi Koreyanın paytaxtı Seul və ətrafında yaşayan 25 milyon adamı təhdid edir. Cənubi Koreyanın əhalinin sıx yaşadığı paytaxtı sərhəddən cəmi 56 kilometr uzaqda yerləşir.
Bundan başqa, Pxenyanın mindən çox ballistik raketi, Cənubi Koreya və Yaponiyadan başqa Sakit Okeanının ortasındakı Amerika bazalarını vura bilər. Hələlik bu raketlərə nüvə başlığı taxıldığına dair bir dəlil yoxdur. Ancaq iki min kilometr mənzilli “Nodong” raketləri bir tonluq döyüş başlıqları daşıya bilər.
Baki-xeber.com
