Makedoniyada etirazçı bir qrup maskalı parlament binasına daxil olaraq deputatları girov götürüb. Baki-xeber.com xəbər verir ki, parlament binasına zorla girərək deputatları girov götürən qrupla qarşıdurmada müxalifət lideri Zoran Zayev də daxil olmaqla bir neçə nəfər yaralanıb.
Aralarında Türkiyənin Anadolu Agentliyinin kameramanının da olduğu bəzi media nümayəndələri də məclis binasında girov qalıb. Əllərində tapançalar olan qrupun onlardan hansı media qurumunda çalışdıqlarını soruşduqları və bəzilərini döydükləri bildirilir.
Girovlar təxminən 6 saat sonra sərbəst buraxılıb.
Son məlumatlara görə, qarşıdurmalarda biri ağır 9 nəfər yaralanıb. Xəstəxanalara qaldırılan yaralılardan alban millət vəkili Zijadin Selanın vəziyyətinin ağır olduğu bildirilir.
Məclis binası qarşısında toplanan milliyyətçi Daxili Makedon İnqilabçı Təşkilatı - Makedoniyanın Milli Birliyi Demokratik Partiyası (VMRO-DPMNE) tərəfdarlarının aksiyaları da davam edir. Ətrafda tez-tez səs bombaları eşidilir.
NATO və Avropa Birliyi (AB) Makedoniya Məclisinə sədr seçimindən sonra bəzi vəkillərin girov götürülməsinə reaksiya verib. NATO-nun baş katibi Jens Stoltenberq social mediadan "Məclisdəki hücumlar qarşısında şoka düşdüm. Bütün partiyalar, demokratik proseslərə hörmət etməli, zorakılığı deyil dialoqyolu tutmalıdır" deyə bildirib.
AB nümayəndəsi Federika Mogerini və AB komissarı Yohannes Han birgə açıqlamasında isə deyilir: " Makedoniya Məclisi üzvlərinə qarşı hücumları ən güclü şəkildə qınayırıq. Məclisdə zorakılıq hərəkətləri heç bir şəkildə qəbul edilə bilməz".
Qeyd edək ki, hadisələr etnik alban Tələt Cəfərinin parlament spikeri vəzifəsinə təsdiq edilməsindən sonra baş verib (APA). Alban milli azlığı təmsil edən partiyanın rəhbəri Tələt Cəfəri səsvermənin nəticələrinə əsasən Makedoniya parlamentinin sədri seçilib. Parlamentin 120 üzvündən 62-si onun namizədliyini dəstəkləyib. Səsvermənin nəticələri elan edildikdən sonra parlament qarşısında piket keçirən “Vahid Makedoniya uğrunda” hərəkatın fəalları binaya daxil olub.
Bundan əvvəl Zoran Zayev ölkə prezidenti George İvanova parlamentdəki 120 deputatdan 67-nin imzasını təqdim edərək, yeni nazirlər kabinetinin formalaşdırılması üçün ona müvafiq mandatın verilməsini xahiş edib.
Prezident G.İvanov dünya liderlərinə ünvanladığı açıq məktubda bildirib ki, onun məlumatına görə, SDİ-nin platformasının icrası ölkə konstitusiyasının dəyişdirilməsini nəzərdə tutur. Prezident qeyd edib ki, istisna olaraq alban milli azlığın maraqlarına cavab verən bu dəyişikliklər, dövlətin unitarlığını və suverenliyini təhlükə altına salır. G.İvanov bu səbəbdən Zayevə mandat verməkdən imtina edib.
