ABŞ Əfqanıstanda terrorçulara qarşı “nüvə olmayan ən böyük bomba”dan istifadə edib. Baki-xeber.com xəbər verir ki, bu barədə ABŞ Müdafiə Nazirliyi (Pentaqon) məlumat yayıb.
Bildirilir ki, ABŞ Hərbi Hava Qüvvələri Əfqanistanın Nanqahar şəhərində İŞİD yaraqlılarının istifadə etdiyi tunel kompleksinə "nüvə olmayan ən böyük bomba" kimi tanınan “GBU-43” bombası atıb.
Pentaqon sözçüsü Adam Stump Anadolu Agentliyinə məlumat verib ki, hücum MC-130 tipli bombardman təyyarəsilə reallaşdırılıb. O, sözügedən bombanın ABŞ-ın istifadə etdiyi ən böyük qeyri-nüvə bombası olduğunu söyləyib. Stump hücumun uzun zamandır planlaşdırıldığını ifadə edib.
ABŞ hadisənin nəticələri barədə detallı məlumatı təsdiqləməyib. ABŞ Prezidenti Donald Trump baş verənləri "daha bir uğurlu iş" adlandırıb.
Əyalətin qubernatoru Qulab Manqal tunellərin İŞİD tərəfindən insanları öldürmək və görüşlər keçirmək üçün istifadə edildiyini bildirib.
Qeyd edək ki, ABŞ ordusunda MOAP (Massive Ordianance Ariblast Bomb) da deyilən bombaya "bütün bombaların anası" da deyilir. Onun çəkisinin 9.5 ton, uzunluğu isə 9 metrə çatır.
ABŞ-ın sözügedən bombadan ilk dəfə istifadə etdiyi qeyd edilir.
Əfqanıstanın Baş icraçısı Abdullah Abdullah hücumun Əfqanıstan və ABŞ arasında koordinasiya ilə edildiyini və "dinc sakinlərə xəsarət yetirməmək üçün böyük diqqət verildiyini" deyib. Əfqanıstan Müdafiə Nazirliyi bombanın bir kəndin yanınıda, Momand dərəsində yerləşən və İŞİD döyüşçüləri tərəfindən istifadə edilən 300 metrlik mağara və tunel şəbəkəsini hədəflədiyini deyib. Nazirlik həmçinin bombanın böyük silah anbarını məhv etdiyini bildirib.
Əfqanıstanın sabiq prezidentli Həmid Karzai hücumu "ölkəmizin qeyri-insani və son dərəcədə mərhəmətsiz istifadəsi" adlandıraraq tənqid edib: "ABŞ yeni silah növlərini sınaqdan keçirmək üçün Əfqanıstandan poliqon kimi istifadə edir".
“ABŞ Əfqanıstanda terrorçuluqla mübarizə aparmır, ölkə ərazisindən yeni və təhlükəli silah növlərinin sınağı üçün poliqon kimi istifadə edir. Mən ABŞ hərbi qüvvələrinin Əfqanıstana ən yeni qeyri-nüvə bombasını atmasını pisləyirəm. Əfqanlar ABŞ-ın qarşısını almaq iqtidarındadır”, - deyə o vurğulayıb.
