Azərbaycanın Sankt-Peterburqdakı baş konsulu metroda baş vermiş partlayış nəticəsində yaralanmış azərbaycanlı Zaur Vəliyevi ziyarət edib. Baş konsul Sultan Qasımovun Trend-ə bildirdiyinə görə, yaralının vəziyyəti stabildir, orta ağırlıqlı olaraq dəyərləndirilir. Baş konsul onu da qeyd edib ki, yaralı sağalmaq üzrədir.
Z.Vəliyev Rusiya vətəndaşıdır və Orenburqda anadan olub.
Azərbaycanın Sankt-Peterburq şəhərindəki Baş konsulluğu Peterburq metrosunda baş vermiş partlayış nəticəsində Dilbər Əliyeva adlı azərbaycanlının öldüyünü də təsdiq etmişdi.
Azərbaycanın Sankt-Peterburqdakı baş konsulu Sultan Qasımov deyib ki, partlayış nəticəsində ölən azərbaycanlı Dilbər Əliyeva Azərbaycan vətəndaşı deyil, o Rusiya vətəndaşıdır: "Dilbər Əliyeva Rusiya vətəndaşı olub, Rusiyada yaşayır və təhsil alırdı".
APA xəbər verir ki, o, Dilbər Əliyevanın dünən yaralı halda İ. Canelidze adına Elmi Tədqiqat İnstitutunun Təcili Tibbi Yardım xəstəxanasına çatdırıldığını deyib: "Təəssüf olsun ki, soydaşımız həyatını itirib".
D. Əliyevanın əslən Azərbaycanın Gəncə şəhərindən olduğunu qeyd edən diplomat bildirib ki, o, Rusiya vətəndaşıdır.
S. Qasımov yaralanan soydaşımız Vəliyev Zaur Müşfiq oğlunun isə xəstəxanada olduğunu bildirib: "Zaur Vəliyevin də əsli Gəncədəndir. O da Rusiya vətəndaşıdır. Hazırda Z. Vəliyev İ. Canelidze adına Elmi Tədqiqat İnstitutunun Təcili Tibbi Yardım xəstəxanasının cərrahiyə şöbəsində müalicə olunur".
Rusiyanın xarici işlər naziri Sergey Lavrov Sankt-Peterburq metrosunda törədilən partlayışın Suriyaya görə intiqam aktı olması barədə fikirləri “həyasızlıq” adlandırıb. Trend-in məlumatına görə, bu fikirlər bir sıra KİV-lər tərəfindən səsləndirilib.
Rusiya İstintaq Komitəsi yaydığı məlumata görə, Sankt-Peterburqda metroda törədilən terror aktının icraçısının cəsədinin hissələri tapılıb. "Partlayıcı qurğunu metroya gətirən kişinin cəsədinin qalıqları üçüncü vaqonda aşkarlanıb. Onun şəxsiyyəti müəyyən edilib. Lakin onun adı hələlik açıqlanmır", - deyə məlumatda qeyd olunub.
Qırğızıstan Dövlət Təhlükəsizlik Xidməti Sank-Peterburqda metroda terror aktı törətməkdə şübhəli sayılan şəxsin adını da açıqlayıb. Məlumata görə, terror aktının 1995-ci ildə Qırğızıstanın Oş vilayətində anadan olmuş, hazırda Rusiya vətəndaşı olan Akberjon Cəlilov tərəfindən törədildiyi ehtimal edilir.
Hazırda Qırğızıstan Dövlət Təhlükəsizlik Xidmətinin Oşdakı müvafiq strukturları Ə. Cəlilovla bağlı bütün məlumatları, əlaqələri araşdırır.
Bu arada, Rusiya və Qırğızıstan xarici işlər nazirləri Sankt-Peterburqda törədilən terror aktının icraçısı ilə bağlı məsələsini müzakirə ediblər. Bu barədə Qırğızıstanın xarici işlər naziri Erlan Abdıldayev rusiyalı həmkarı Sergey Lavrovla keçirdiyi birgə mətbuat konfransında bildirib.
”Biz bu gün görüşdə Sankt-Peterburqda baş verən terror aktını müzakirə etdik. Terroru törədən şəxs Qırğızıstan əsillidir, lakin o, Rusiya vətəndaşlığını qəbul edib. Bizim Dövlət Təhlükəsizlik Komitəsi də terrorçu-kamikadzenin Qırğızıstan əsilli Rusiya vətəndaşı olduğunu təsdiqləyib”, - deyə E. Abdıldayev vurğulayıb.
Nazir terrorçu-kamikadzenin İŞİD-lə əlaqəli olub-olmadığı barədə suala da cavab verib. Onun sözlərinə görə, terrorçu-kamikadzenin İŞİD-lə əlaqəli olub-olmadığını söyləmək hələ tezdir: “Bunun üçün xüsusi xidmət orqanlarımızın apardıqları işin sona çatmasını gözləmək lazımdır. Onlar bizə tam məlumat verəcəklər”.
Sergey Lavrov isə çıxışında terrorçunun milliyyətinin olmadığını söyləyib: “Terrorçuluğu insanın hansı milliyyətə və dinə mənsub olması ilə əlaqələndirmək olmaz, bu, qəbuledilməzidir Terrorçuluq bütün bəşəriyyətə, bütün dünya dinlərinə qarşıdır”.
Xatırladaq ki, ötən gün Sankt-Peterburq metrosunda baş vermiş partlayış nəticəsində həlak olanların sayı 14 nəfərə çatıb.
Bu arada, Sankt-Peterburqda mağazaların birində şübhəli çantanın aşkar olunmasından sonra işçilər və müştərilər təxliyə olunub. Trend-in məlumatına görə, mağaza boşaldıldıqdan sonra mütəxəssislər araşdırmalara başlayıb.
Nəticədə bu çantanın noutbuk çantası olduğu aşkar edilib.
Moskvanın cənub-şərqində isə xəttdə olan elektrik qatarı şübhəli çanta aşkar edildiyindən dərhal depoya göndərilib. Paytaxtın Fövqəladə Xidmət əməkdaşının sözlərinə görə, şübhəli çanta "Lyublino" stansiyasında "Qolıtsino-Podols" elektrik qatarının üçüncü vaqonunda aşkar edilib: "Qatar yoxlanılmaq üşün depoya göndərilib. 80 nəfər təxliyə edilib".
