Sankt-Peterburq şəhərinin metropoliteninin iki stansiyasında eyni vaxtda partlayış baş verib. Baki-xeber.com xəbər verir ki, Partlayış "Sennaya Ploşad" və ondan sonrakı “Texnoloji institut” stansiyasında baş verib. Hadisə nəticəsində 10 nəfər ölüb, 50-dən çox adam yaralanıb.
Hadisə şahidləri iki partlayıcı qurğunun işə düşdüyünü bildirib. Hüquq-mühafizə orqanlarındakı mənbə bildirib ki, partlayışın terror aktı nəticəsində baş verdiyi istisna olunmur.
“Interfax” agentliyi partlayışa vagona yerləşdirilən bombanın yol açdığını bildirir. Rusiya mediası partlamayan üçüncü bombanın tapıldığını da iddia edir.
Hadisə şahidlərinin bildirdiyinə görə, partlayış nəticəsində çoxlu sayda yaralanan var. Onların sözlərinə görə, partlayış qatar hərəkətə başlayan zaman baş verib.
Hadisə şahidi Yuliya Vareyeva bildirib ki, partlayış nəticəsində vaqonun döşəməsinin lyuku yerindən çıxıb və sonra tüstülənmə başlayıb.
“Sputnik”in məlumatına görə, hadisədən dərhal sonra şəhərdəki bütün metro stansiyaları bağlanıb.
Sankt-Peterburq şəhər metrosunda baş vermiş partlayış nəticəsində ölən və yaralılar arasında Azərbaycan vətəndaşlarının olub-olmadığı araşdırılır. Bunu APA-nın Rusiya bürosuna açıqlamasında Azərbaycanın Sankt-Peterburqdakı baş konsulu Soltan Qasımov bildirib. O deyib ki, konsulluq ölən və yaralananlar arasında Azərbaycan vətəndaşlarının olub-olmadığını müvafiq qurumlarla dəqiqləşdirir.
Hadisə barədə Rusiya prezidenti Vladimir Putinə məruzə olunub. Kremlin mətbuat katibi Dmitri Peskovun bildirdiyinə görə, həmin vaxt Putin belaruslu həmkarı Aleksandr Lukaşenko ilə danışıqlar aparırmış. Danışıqlar dayandırılmayıb.
Rusiya prezidenti Vladimir Putin də Sankt-Peterburq metrosunda baş vermiş partlayışla bağlı açıqlama verib(APA). Belaruslu həmkarı ilə görüşü zamanı Putin bildirib ki, partlayışla əlaqədar bütün versiyalar araşdırılır.
APA-nın məlumatına görə, Rusiya Baş Prokurorluğunun nümayəndəsi Aleksandr Kurennoy isə “Rossiya 24” telekanalının efirində Sankt-Peterburq metrosunda baş vermiş partlayışın terror aktı olduğunu deyib.
Təhlükəsizlik sisteminin işinin yoxlanılıb-yoxlanılmayacağına gəldikdə isə A. Kurennoy bildirib ki, məsələ ilə bağlı istintaq orqanlarının əməkdaşları məşğul olacaqlar.
Rusiya İstintaq Komitəsinin saytında yer alan məlumatda isə deyilir ki, Peterburq metrosunda baş vermiş partlayışla əlaqədar cinayət işi açılıb.
Rusiya Milli Antiterror Komitəsi (MAK) Sankt-Peterburqda metroda baş verən partlayış nəticəsində ölən və yaralıların sayını açıqlayıb. MAK partlayış nəticəsində 9 nəfər öldüyü, 20 nəfər yaralandığını təsdiqləyib.
Sankt-Peterburq qubernatoru Georgi Poltavçenko isə bildirib ki, metroda partlayış nəticəsində 10 nəfər ölüb, 20 nəfər yaralanıb.
Rusiya səhiyyə naziri Veronika Skvortsova isə partlayış nəticəsində 10 nəfərin öldüyünü, 47 nəfərin yaralandığını açıqlayıb.
Qeyd edək ki Rusiyanın metro stansiyaları əvvəllər də terror hücumuna hədəf olmuşdu. 2010-ci ildə Moskva metrosunun sıx olduğu dəqiqələrdə törədilən partlayışda 39 nəfər həlak olmuşdu.
Ölkədəki son böyük terror hücumları isə, 2013-cü ilin dekabrında Volqoqrad şəhərində baş verib. Həmin vaxt kamikadzelər bir avtobus və qatar stansiyasında özlərini havaya uçurmuşdu, hücumlarda 35 nəfər həyatını itirmişdi.
