Rusiya müxalifət lideri Aleksey Navalnıy bazar günü keçirilən etiraz aksiyalarında saxlandıqdan sonra dünən məhkəmə qarşısına çıxarılıb. İcazəsiz aksiya keçirməkdə ittiham edilən Navalnıy 15 gün həbs cəzası alıb.
Baki-xeber.com xəbər verir ki, Moskva, Sankt-Peterburq, Vladivostok, Novosibirsk, Tomsk və bir neçə digər şəhərdə keçirilən aksiyalarda minlərlə etirazçı iştirak edib və ən azı 500 nəfər həbs edilib. Navalnıyın həbsinə mane olmaq istəyən yüzlərlə tərəfdarı ilə polislər arasında qarşıdurma yaranıb.
Aksiyalar Navalnıy tərəfindən hazırlanmış baş nazir Dmitri Medvedyev haqqında korrupsiya iddialarının yer aldığı hesabatın ortaya çıxmasından sonra təşkil edilib. Etirazçılar Medvedyevin istefasını tələb edir.
Navalnıy məhkəmə çıxışında baş nazir Medvedyevin məhkəməyə çağırılmalı olduğunu deyib.
40 yaşlı Navalnıy Tverski məhkəməsində hakim qarşısına çıxarılmamışdan əvvəl "Twitter" hesabında bir şəklini paylaşıb və altında bu sözləri yazıb: "Tverski məhkəməsindən salamlar. Vaxt gələcək ki, biz onların məhkəməsini keçirəcəyik".
Navalnıy, həmçinin, saxlanan etirazçıların öz işlərini Avropa İnsan Haqları Məhkəməsinə aparmasını istədiyini bildirib.
"İnstagram"da bazar gününün necə keçdiyi sualına cavabında Medvedyev, sadəcə, "Pis deyil, xizək sürdüm" deyib.
Avropa İttifaqı (Aİ) saxlanan etirazçıların dərhal buraxılmasını tələb edib.
Rusiya prezidenti Vladimir Putinin sözçüsü Dimitri Peskov isə bazar günü keçirilən nümayişlərin təxribat olduğunu deyib. Moskva rəhbərliyi nümayişə qatılanların Navalnıydan pul aldığını iddia edir.
Rusiya xarici işlər naziri Sergey Lavrov isə deyib ki, Rusiyada etiraz aksiyası keçirmək üçün edilən müraciətlə əlaqədar bələdiyyə orqanlarının qərarı onların səlahiyyətləri çərçivəsində qəbul olunub. O, etiraz aksiyası zamanı həbslərə də münasibət bildirib: "ABŞ və Avropa ölkələrində qanun pozuntusu baş verərkən, o cümlədən etiraz aksiyası zamanı nümayişçilərin icazə verilməyən yerdə yığışması zamanı polisin onlarla necə rəftar etdiyini yaxşı xatırlayıram. Bu zaman dəyənəklərdən də, gözyaşardıcı qazdan da istifadə olunur. Bizim jurnalistlərimiz, o cümlədən ötən ilin payızında "Russian Today" kanalının çəkiliş qrupu ABŞ-da etiraz aksiyasını işıqlandırmaq istəyərkən bu halla üzləşiblər".
Müşahidəçilər hazırkı aksiyaların 2011 və 2012-ci illərdə təşkil edilən aksiyalardan sonra ən böyük etiraz aksiyaları olduğunu deyir.
