Böyük Britaniya yeni bir sarsıntı ilə üzləşir. Baki-xeber.com xəbər verir ki, Şotlandiya baş naziri Nikola Stercen ölkəsinin Birləşmiş Krallıqdan ayrılması üçün yeni bir referenduma getməyə hazırlaşır.
Şotlandiyanın birinci naziri bəyan edib ki, təkrar müstəqillik referendumunun keçirilməsi üçün regional parlamentin icazəsini alacaq. O bu qərarını onunla izah edib ki, şotlandların əksəriyyəti “Brexit”in əleyhinədir və Britaniya ilə birlikdə Avropa İttifaqını tərk etmək istəmir.
Stercen keçən il keçirilən AB referendumundan əvvəl müstəqillik referendumuna gedə biləcəklərini demişdi.
Şotlandiya Britaniyanın Avropa İttifaqındakı üzvlüyünə son qoyan referendumun nəticəsi ilə razı deyil. Şotlandların 62 faizi 2016-cı ilin iyununda keçirilmiş referendumda Britaniyanın Avropa İttifaqının tərkibində qalmasına səs verib.
Hələ ötən sentyabrın əvvəllərində Stercen bildirmişdi ki, Şotlandiya hökuməti ikinci müstəqillik referendumunun keçirilməsi üçün lazımi qanunvercilik bazasını hazırlamaqdadır.
Mövcud qanunlara görə, Britaniya hökumətinə referendum keçirmək barədə müraciətdən əvvəl xanım Stercen Şotlandiya parlamentinin razılığını almalıdır.
N.Stercen deyib ki, yeni referendumu 2018-ci ilin payızı ilə 2019-cu ilin yazı arasında keçirmək istəyir.
O, referendumda müstəqillik tərəfdarlarının qalib gələcəyinə inandığını deyib: "Yeni bir müstəqillik referendumunu qazana bilərəm".
Şotlandiyanın birinci naziri iddia edir ki, Britaniyanın Avropa İttifaqından çıxmaq qərarı ilə əlaqədar şotlandlar öz təhlükəsizliklərini təmin etməlidirlər. O, deyib ki, şotlandların öz gələcəklərini müəyyən etmək hüququ var.
Yeni referendumun keçirilməsi şərtlərini Şotlandiya parlamenti elan etməlidir.
2014-cü ilin sentyabrında Şotlandiyada keçirilmiş müstəqllik referendumunda şotlandların 55, 3 faizi Britaniya krallığının tərkibində qalmağa səs vermişdi. Lakin hakim Şotlandiya Milli Partiyasının qənaətincə, Böyük Britaniyanın Avropa İttifaqından çıxması barədə qərar vəziyyəti tamamilə dəyişib.
Şotlandiyanın Böyük Britaniyanın tərkibindən ayrılmaqla bağlı referendum keçirmə planına münasibət bildirən NATO Baş katibi Yens Stoltenberq isə bildirib ki, Şotlandiya müstəqillik qazanarsa, NATO üzvlüyünü itirəcək. O, bildirib ki, belə olduğu halda, Böyük Britaniya təşkilatın tərkibində qalacaq, Şotlandiya isə yeni dövlət kimi üzvlüklə bağlı müraciət etməli olacaq.
