Avstriyanın xarici işlər naziri Sebastian Kurzun təklifləri Gürcüstanda qızğın müzakirə doğurub. Kurz Almaniya mətbuatına müsahibəsində Gürcüstan, Misir və Qərbi Balkan ölkələrində miqrantları qəbul mərkəzlərinin yaradılmasını təklif edib. Təklif Tiflisin heç xoşuna gəlməyib. Ancaq Gürcüstan siyasətçilərindən əvvəl rus siyasətçilər dilə gəliblər.
Baki-xeber.com “Azadlıq radiosu”na istinadən xəbər verir ki, Sebastian Kurz "Bild"ə müsahibəsində Avropa Birliyi xaricində qaçqınları qəbul mərkəzlərin yaradılmasını vacib sayır. Onun sözlərinə görə, belə mərkəzlərin harada yerləşməsi o qədər də önəmli deyil: “Vacib olan odur ki, miqrantların təhlükəsizliyi təmin edilsin. Avropaya qanunsuz yollarla girmək istəyən adamları isə həmin ölkələrə qaytarsınlar. Belə qurumlar Misir, Gürcüstan, yaxud Qərbi Balkan ölkələrinin birində yerləşə bilər”.
Məsələyə ilk olaraq Rusiya reaksiya verib. Gürcüstan mediası avstriyalı nazirin bu fikrinə yalnız rusiyalı həmkarlarından sonra diqqət yetiriblər.
Rusiya Federasiya Şurasının Müdafiə və Təhlükəsizlik Komitəsi sədrinin birinci müavini Frants Klintseviç deyib ki, Gürcüstan ərazisində qaçqın qəbul mərkəzlərinin yaradılması Rusiya ərazisində də təhlükəsizliyə təsir göstərəcək. Digər senator Aleksey Puşkov isə “tvitter”də yazıb: “Avstriya Xarici İşlər Nazirliyinin başçısı qaçqınları AB-dən Gürcüstana göndərməyi təklif edib. Görünür, vizasız rejimin müqabilində... Maraqlıdır, Gürcüstan AB-yə yox deyə biləcəkmi?”.
Gürcülər bu şərhləri sosial şəbəkələrdə qızğın dartışmağa başlayıblar. Gürcüstan XİN isə bəyanat yayaraq bildirib ki, AB-yə üz tutmuş qaçqınların qəbulu üçün hər hansı mərkəzlərin yaradılmasına dair hər hansı səviyyədə danışıqlar aparılmır. Bəyanatda o da deyilir ki, avstriyalı nazir Sebastian Kurzun özü bir ay öncə, ATƏT sədri olaraq, Gürcüstana səfər edib, amma bu barədə bircə kəlmə də danışmayıb.
Gürcüstanın qaçqın məsələləri üzrə naziri Sozar Subari də məsələ haqqında açıqlama verib: “Gürcüstanda qaçqınlar üçün düşərgələrin açılması planlaşdırılmayıb və planlaşdırılmır. Biz öz beynəlxalq öhdəliklərimizi yaxşı yerinə yetiririk. Əlavə öhdəliklər mümkün deyil, xüsusən nəzərə alanda ki bizim özümüzün ölkə daxilində 274 min qaçqınımız var. Onların 2/3-si yaşayış yeri ilə təmin edilməyib”.
Politoloq Kaxa Qoqolaşvili isə sosial şəbəkələrdə və mediada baş qaldıran çaxnaşma arxasında antiqərb təbliğatının izlərini görür. O deyir ki, Gürcüstan artıq viza prosedurlarının liberallaşdırılması üçün bütün tələbləri yerinə yetirib və buna görə heç nə ödəməli deyil: “Bizim Rusiya ilə vizasız rejimimiz yoxdur. Bu üzdən Rusiya heç nədən rahatsız olmasın. Heç Gürcüstan vətəndaşlarının da Rusiyaya getməsi asan deyil. Qaçqınlardan isə heç söhbət gedə bilməz. Rusiyanın özü bunu istəməsə, qaçqınların Gürcüstandan Rusiyaya keçməsi, demək olar, imkansızdır. Buna görə də, Rusiya tərəfinin bəyanatları təxribat xarakteri daşıyır. Bu, Gürcüstanın suveren işlərinə qarışmaqdır. Özü də elə işlərinə ki, heç baş verməyib və baş verə də bilməz”.
Beynəlxalq münasibətlər mütəxəssisi Tornike Şarşenidze isə deyir ki, AB-dən Gürcüstana belə bir təklif gəlsə, Gürcüstan imtina etməlidir: “Bu, bizi qane etmir. Bu, ölkəmizdə AB və Qərbə qarşı əlavə isterika doğuracaq. Biz görürük ki, rusiyapərəst və antiqərb gürcü KİV-ləri həmin təklifdən yeni antiqərb isterikası yaratmaq üçün çox yaxşıca yararlandılar. Ümid edirəm ki, hökumət məsələni vaxtında aydınlaşdıracaq və Avropa Birliyi də bildirəcək ki, bu, bir nazirin ideyasından başqa bir şey deyildi”.
