ABŞ-ın baş prokuroru Ceff Seşşonsun Rusiya səfiri Sergey Kislyakla seçkilərdən əvvəl iki dəfə görüşməsi xəbəri Vaşinqtonda şok effekti yaradıb. Baki-xeber.com xəbər verir ki, yayılan xəbərlərdən sonra C.Seşşons Rusiyanın 2016-cı il prezident seçkilərinə hər hansı müdaxiləsi ilə bağlı mümkün bütün federal təhqiqatlardan özünü uzaqlaşdırıb.
“The Washington Post” qəzeti Seşşonsun senator olduğu zaman Rusiya səfiri Sergey Kislyakla seçkilərdən öncə iki dəfə görüşdüyü haqda məlumat yayıb.
Seşşons özünü təhqiqatdan Ədliyyə Nazirliyinin əməkdaşlarının tövsiyəsi əsasında uzaqlaşdırdığını bildirib. O, bu qərarın məsələ ilə bağlı hansısa təhqiqat aparıldığının təsdiqlənməsi kimi yozulmamasına çağırıb.
Baş prokuror kimi təsdiq olunan Seşşons həmin görüşlər barədə Senatda təsdiqləmə dinləməsində məlumat verməmişdi.
Seşşonsun səfirlə görüşləri barədə suallar dolaşmağa başlayıb. Hər iki partiyanı təmsil edən bəzi qanunvericilər maraqlar kəsişməsini əsas gətirərək Seşşsonsun mümkün təhqiqatdan uzaq durmasını tələb ediblər. Bəzi Demokratlar Seşşonsu and altında keçirilən dinləmədə yalan danışmaqa ittiham edərək onun istefasını tələb ediblər.
Prezident Donald Tramp isə bildirib ki, Seşşons özünü bu növ təhqiqatdan uzaqlaşdırmalı deyil. O, baş prokuroru “dürüst adam” adlandırıb: “Demokratlar ifrata varırlar. Onlar seçkiləri uduzublar, indi də reallıq hissini itirməkdədirlər. Bu, cadugər ovudur”.
Yanvarın 10-da keçirilən təsdiqləmə dinləməsində Demokrat Senator Al Franken Seşşsondan Tramp kampaniyası nümayəndələrinin Rusiya hökuməti ilə təmaslara dair dəlil olub-olmadığını soruşmuşdu. “Mən bu növ fəaliyyətdən bixəbərəm… Mənim ruslarla təmasım olmayıb və bunu şərh edə bilmərəm” - deyə Seşşons həmin dinləmədə bildirmişdi.
Bu arada, “New York Times” qəzeti, Ağ Evə istinadən prezident Donald Trampın kürəkəni Cared Kuşnerin də dekabr ayında Rusiya səfiri Sergei Kislyakla görüşdüyünü yazıb. 20 dəqiqə davam edən görüşdə Kuşnerdən başqa təhlükəsizlik müşaviri Maykl Flinn də iştirak edib.
Flinnin səfirlə telefon söhbəti ortaya çıxandan sonra o, istefaya getməyə məcbur olmuşdu.
Ağ evin sözçüsü deyib ki, Kuşner başqa ölkələrin də təmsilçilərilə, 20-yə yaxın ölkə lideri və təmsilçisilə görüşüb. Onun sözlərinə görə, rusiyalı səfirlə toplantıda M.Flinn də olub və gələcək müşavirlər ölkələr arasındakı münasibətləri müzakirə ediblər, ünsiyyət yaratmağa çalışıblar.
Halbuki yanvarda M.Flinnin səfir S.Kislyakla əlaqəsi haqda suallara cavab verəndə, Ağ Ev onların yalnız telefonla, həm də sanksiyalardan öncə danışdığını bildirmişdi. Sonralar hər şeyin başqa cür olduğu, danışıqların səfir Dövlət Departamentinə çağırılandan, Obama administrasiyası rus diplomatlarını ölkədən qovduğunu bildirəndən dərhal sonra baş tutduğu ortaya çıxıb.
Dövlət Departamentindəki söhbətdən xəbəri olanlar səfir S.Kislyakın sanksiyalara görə, qəzəbli olduğunu, Rusiyanın buna cavab verəcəyini dediyini söyləyirlər. Departamenti tərk edəndən sonra isə onun məhz M.Flinnə zəngi qeydə alınıb. Sonrakı 36 saat ərzində isə səfirin hər iki zəngdən birini M.Flinnə etdiyi müəyyən olunub. Kəşfiyyat agentliklərinin əldə etdiyi səs yazıları M.Flinnin rusları sanksiyalara cavab verməməyə çağırdığını, D.Trampın prezidentliyi dövründə münasibətlərin yoluna qoyulacağını dediyini göstərib. Amma sonrakı müsahibələrində müşavir bu haqda doğru-dürüst məlumat vermirdi, elə ona görə də cəmi 3 həftədən sonra vəzifədən getməli oldu.
Ağ Evin M.Flinnin, C.Kuşnerin səfirlə görüşü haqda açıqlaması yeni suallar yaradıb. D.Trampa yaxın olanlardan, seçki kampaniyasının təşkilatçılarından daha kimlərin rus rəsmilərilə görüşdüyü, hansı məsələləri müzakirə etdiyi, bu görüşlərin tez-tezmi, ya təsadüfənmi baş tutması qaranlıq qalır.
Rusiyanın ABŞ-dakı səfiri S.Kislyak keçmiş təhlükəsizlik müşaviri M.Flinnlə 2013-cü ildən tanış olduğunu, seçki kampaniyası zamanı əlaqə saxladıqlarını etiraf edib. «Bütün diplomatlar belə edirlər», – səfir «The Washington Post» qəzetinə müsahibəsində deyib. Amma M.Flinnlə hansı məsələləri müzakirə etdiklərini açıqlamaq istəməyib.
AP agentliyi və «USA Today» qəzeti isə D.Trampın seçki kampaniyası zamanı xarici siyasət məsələləri üzrə müşavir olmuş Karter Pagein, həmçinin milli təhlükəsizlik məsələləri üzrə direktor J.D.Qordonun da «Heritage» fondunda Rusiya səfirilə görüşdüyünü yazır. Seşşonsun səfirlə görüşlərindən biri həmin tədbir çərçivəsində olub.
«The New York Times» yazır ki, əslində, keçid hökuməti rəsmilərinin hansısa ölkə rəsmisilə görüşündə bir qəbahət yoxdur. Amma söhbət Rusiyanın seçkilərə müdaxiləsindən getdiyi vaxtda məhz rus səfirlə telefon danışıqları, görüşlər, həm də bu görüşlərin seçki ərəfəsinə və seçkidən sonraya düşməsi, üstəlik, rəsmilərin dinləmələrdə bu haqda danışmamaqları, ya da hər dəfə bir cür danışmaqları ABŞ-da əməlli-başlı səs-küy yaradıb. Qəzeti görüşlərin Rusiyanın seçkiyə müdaxiləsini araşdıran Federal Tədqiqatlar Bürosundan (FBI) ötrü önəmli olduğunu vurğulayır.
İndi Demokratlar baş prokuroru Ceff Seşşonsun istefa verməsi üçün təzyiqlərini arırır. ABŞ prezidenti Tramp da təzyiq altındadır. Tramp, bundan əvvəl Rusiya ilə əlaqəsi ifşa edilən milli təhlükəsizlik müşaviri Maykl Flinnin istefaya getməsi ilə ilk qurbanı vermişdi. İndi maraqlıdır, Trampın komandasında rus səfirin güdazına gedən ikinci qurban Seşşons olacaq?
