«Britaniya Rusiyanın düşməni deyil və Vladimir Putinə ittihamları dayandırmaq lazımdır». Britaniya parlamentinin Xarici Əlaqələr Komitəsinin üzvləri belə bəyanatla çıxış ediblər. Deputatlar hökuməti Rusiya ilə münasibətləri yoluna qoymağa, sərt yol tutmaqdan çəkinməyə, həm də 2018-ci ildə Rusiyada keçiriləcək Dünya Çempionatını boykot etməməyə çağırıblar.
Baki-xeber.com xəbər verir ki, bu barə Britaniya mətbuatı yazır. Qeyd edilir ki, yeni ABŞ administrasiyasından və Fransanın prezidentliyə namizədlərindən fərqli olaraq, Böyük Britaniya indiyə qədər Rusiyaya qarşı sərt mövqe tutub, Rusiyada insan haqlarının durumunu, qanunun aliliyinin təmin olunmamasını, Suriyada baş verənləri tənqid edib. Ancaq parlamentarilər bütün bunlara baxmayaraq, ölkələr arasında körpü qurmağı, bundan ötrü Dünya Çempionatından yararlanmağı tövsiyə edirlər.
Britaniyalı deputatların bəyanatında ölkənin Rusiyanın Suriyadakı cinayətlərinin araşdırılması ilə bağlı çağırışlarına şübhə ilə yanaşılıb. Britaniya BMT-nin belə bir araşdırma aparmasını istəyib. Parlamentarilər hesab edirlər ki, bu tələb Qərbin düşmənçiliyinə və ikili standartlarına məruz qaldığını iddia edən Kremli bir az da qızışdırır.
Ukrayna məsələsinə gəlincə, parlament üzvləri Rusiyaya sanksiyaların qalmasına tərəfdardırlar, ancaq bu məsələdə Rusiyaya qarşı çıxmaqla hökumətin «tək qalmış oyunçuya çevrilmək» təhlükəsilə üzləşdiyini, bunun isə Britaniyanın Rusiyaya təsir gücünü, nüfuzunu zərbə altında qoyduğunu vurğulayırlar.
Sənəd müəlliflərinin fikrincə, Rusiya ilə Britaniyanın münasibətləri “Soyuq müharibə” dövründən bəri ən pis həddədir. Halbuki London Moskva ilə əməkdaşlıqdan tam imtina edə bilməz, çünki bunun effekti olmaz.
«Böyük Britaniya Rusiya ilə öz prinsiplərini, dəyər və standartlarını qurban vermədən də dialoq apara bilər», – deyən parlamentarilər hesab edirlər ki, Britaniya Rusiyanın əhəmiyyətini nəzərə almalı, ortaq maraq nöqtələri tapmalı və bundan, yeri gələndə, münasibətləri yaxşılaşdırmaqdan ötrü istifadə etməlidir.
«Rusiyayla istənilən dialoqa ehtiyatla getməli, ancaq dialoqdan imtina etməməliyik», – Britaniya parlamenti üzvlərinin bəyanatında belə deyilir.
Britaniya parlamentinin Xarici Əlaqələr Komitəsinin üzvləri hesab edirlər ki, «antiqərb putinizmi» ideologiyası Rusiyada Qərb əleyhinə düşüncəni möhkəmləndirir.
Rusiya ilə Britaniya arasında gərginliyin əsas səbəbləri Rusiyanın Gürcüstan, sonra da Ukraynaya müdaxiləsi, Kremlin tənqidçilərindən Aleksandr Litvinenkonun Londonda qətlə yetirilməsi kimi hadisələrdir.
