Fransa prezidentliyinə namizəd Fransua Fiyonun həyat yoldaşı Penelop Fiyon saxlanıb. Onun maliyyə pozuntusu ilə bağlı ifadə verdiyi bildirilir. Bu barədə “Reuters” agentliyi xəbər yayıb. Fransanın “Mediapart” nəşri də özünün Tvitter hesabında belə bir məlumat yayıb.
Qeyd edək ki, ötən ay prokurorluq Penolepe Fiyon barəsində istintaq işinə başlandığını bəyan etmişdi.
“Le Canard Enchaine” qəzetində gedən yazıdan sonra Fransua və Penelope Fiyonlar korrupsiya qalmaqalı ilə bağlı diqqət mərkəzinə düşüblər. Qəzetin yazdığına görə, Penelope Fiyon bir neçə il Fransa parlamentinin aşağı palatasında həyat yoldaşının köməkçisi işləyib, amma faktiki olaraq heç bir öhdəliyi olmayıb. Məlumata görə Penelope bu müddət ərzində ümumilikdə təxminən 500 min avro maaş alıb.
Maliyə pozuntusu qalmaqalı ilə üzləşən Fransa prezidentliyinə namizəd Fransua Fiyon isə mübarizədən çəkilmək fikrində olmadığını bildirib. Baxmayaraq ki, bundan əvvəl o bildirmişdi ki, ona qarşı rəsmi ittiham irəli sürülsə namizədliyini geri götürəcək. Məlumata görə, Fiyon ona qarşı irəli sürülən ittihamı “siyasi qətl” adlandırıb.
Fillon həmçinin martın 15-də məhkəmə qarşısında dayanacağını bildirib. Həmin prosesdə ona qarşı dövlət əmlakını oğurlamaqla bağlı rəsmi ittiham irəli sürülməlidir.
Fransa prezidentliyinə başqa bir namizəd Marine Le Pen isə deputat toxunulmazlığından məhrum oluna bilər. Avropa Parlamentinin bu məsələyə baxacağı gözlənilir. Bu barədə “İndependent” məlumat yayıb.
Məlumata görə onun deputat toxunulmazlığından məhrum edilməsini Nant prokurorluğu istəyib. Prokurorluq onun sosial şəbəkələrdə “İslam dövləti” yaraqlılarının edam fotolarını yayması ilə bağlı hazırda istintaq aparır. Söhbət , Marine Le Penin 2015-ci ildə Tvitterdə amerikalı jurnalist Ceyms Folinin öldürülməsi də daxil olmaqla terrorçuların edam fotolarını yaymasından gedir. Bir sıra hüquqşünaslar bunu zorakılığın təbliği adlandırıblar. Amma Marine Le Pen deputat toxunulmazlığından istifadə edərək prokurorluğun çağırışına məhəl qoymayıb.
Avropa Parlamentinin hüquq məsələləri üzrə komitəsi artıq onun deputat toxunulmazlığından məhrum edilməsinə səs verib. İndi deputatlar bunu ümumi səsvermədə də təsdiqləməlidirlər.
Rəy sorğularına görə, Marine Le Pen seçkinin birinci mərhələsində qalib gəlsə də ikinci mərhələdə uduzacaq.
Qeyd edək ki, aprelin 23-də Fransada növbəti prezident seçkisi keçiriləcək.
