ABŞ prezidenti Federal Təhqiqat Bürosunu (FBİ) məxfi məlumatların mediaya sızmasına görə tənqid edib. Donald Tramp deyib ki, məlumatların sızması ölkəyə fəlakətli təsir göstərir.
Baki-xeber.com xəbər verir ki, Tramp bunları Tvitter səhifəsində yazıb. Onun tənqidləri Ağ Evin kadrlar şöbəsinin rəhbəri Reyns Pribusun FBİ rəsmilərindən media xəbərlərinin təkzib edilməsini istəməsindən sonraya təsadüf edir.
Məlumatlar Trampın seçki müşavirlərinin seçkiqabağı kampaniyalar zamanı Rusiyanın kəşfiyyat orqanları ilə əlaqədə olduqlarına dairdir.
"FBI milli təhlükəsizlik məlumatlarının yayanları dayandırmaq qabiliyyətinə malik deyil. Onlar bunu hətta öz idarələri daxilində bacarmır" - deyə prezident yazır.
Donald Tramp əlavə edib ki, məxfi məlumatların mediaya sızdırılması ABŞ-a dağıdıcı təsir göstərə bilər.
Ağ Ev FBI-dan xahiş edib ki, prezidentin müşavirlərinin ruslarla bağlılığı haqda yazıları təkzib etsin. ABŞ mətbuatının yazdığına görə, Ağ Ev administrasiyasının rəhbəri Reyns Pribus məqalələri inkar etməsi, jurnalistlərlə söhbət edərək, heç olmasa, yazılanları şübhə altına alması üçün FBI-a müraciət edib.
Ancaq CNN FBI direktoru Ceyms Komeyin müraciəti rədd etdiyini, bunu Rusiyanın ABŞ-da seçkilərə müdaxiləsilə bağlı araşdırmanın davam etməsilə bağladığını yazır.
CNN, əslində, Ağ Evin FBI-a müraciətinin qanunsuz olduğunu, bu iki orqan arasında belə birbaşa əlaqələrin qanunla məhdudlaşdırıldığını qeyd edir. Yəni Ağ Evin araşdırmanı aparmaqda olan FBI-a təzyiqi prosedur qaydalarının pozulması deməkdir.
Ağ evin sözçüsü Şon Spayser CNN-nin müraciəti belə yozmasına etiraz edərək, «Biz onlara təzyiq etmirik, sadəcə, doğru olanı dilə gətirməklərini istəmişik», – deyib.
FBI mətbuata məsələ ilə bağlı açıqlama vermir. Büronun Ağ Evə rədd cavabı göndərdiyini də CNN-ə adının açıqlanmasını istəməyən bir hüquq-mühafizə orqanı rəsmisi verib. Onun dediyinə görə, «The New York Times»ın ruslarla bağlantılar haqda məqaləsi çıxandan bir gün sonra Ağ Evdə, hansısa toplantı çərçivəsində R. Pribusla FBI-ın direktor müavini Andrey Makkeybin görüşü olub. Sonra isə R.Pribus yenə onunla və C.Komeylə əlaqə saxlayıb. Ağ Ev əvvəl bu məlumatları təkzib etsə də, sonra təsdiqləyib.
Qeyd edək ki, bu günlərdə «The New York Times» prezident Donald Trampın seçki kampaniyası müşavirlərinin rus kəşfiyyat orqanları ilə bağlılığı haqda məqalə dərc edib. FBI bir söz deməsə də, Ağ Ev «The New York Times»ın məqaləsini «zir-zibil» adlandırıb.
«The New York Times»ın yazısı heç bir mənbəyə əsaslanmır, amma Tramp kampaniyasının rus casusları ilə əlaqəsindən bəhs edir… Bizdə indi bu məsələni araşdıranlar çoxdur. Amma sizi inandırıram ki, mənə bunu deməyə səlahiyyət də verilib, kəşfiyyat idarələri bizə bu yazılanların doğru olmadığını, tam səhv olduğunu bildiriblər» - Ağ Ev administrasiyasının rəhbəri R.Pribus deyib.
R.Pribusun dediklərinə baxmayaraq, CNN-nin Konqresin kəşfiyyat komitələrindən əldə etdiyi məlumata görə, D.Trampın kampaniya üzvlərinin ruslarla əlaqəsilə bağlı şübhələr var və araşdırmalar davam edir: «Komitənin nəyi tapacağı, nəyi aşkara çıxaracağı, hansısa informasiyanı ictimaiyyətə açıqlayıb-açıqlamayacağı bəlli deyil. Amma araşdırmaların davam etməsi Konqresin dərinə getdiyini və bu dərinlərin Ağ Evi narahat etdiyini göstərir».
