Avropadakı görüşlərini Brüsseldə davam etdirən ABŞ-ın vitse-prezidenti Mike Pence Avropa Birliyi (AB) Şurasının sədri Donald Tuskla bir araya gəlib.
Baki-xeber.com xəbər verir ki, görüşün ardından jurnalistlərin qarşısına keçən Pence və Tusk ABŞ-la AB arasındakı əlaqələr haqda açıqlamalar verib. Ancaq salonda onların açıqlamalarından daha çox diqqət çəkən bir şey vardı.
Pence və Tuskun dayandığı kürsülərin arxasındakı ekrana ABŞ və AB bayraqları salınıb. Ancaq seçilən ABŞ bayrağında kiçik, amma mahiyyətcə böyük bir yanlışlığa yol verilib. Çünki bayrağın sol üst küncündə olması gərəkən 50 ulduz yerində, 51 ulduz yer alıb.
