Böyük Britaniyanın keçmiş baş naziri referendumda “Brexit”ə “xeyr” deyənlərə çağırış edib. Toni Bleyr Birləşmiş Krallığın Avropa Birliyindən (AB) ayrılmasını nəzərdə tutan “Brexit” qarşı çıxanları ayağa qalxmağa çağırıb.
Baki-xeber.com xəbər verir ki, ölkəsinin AB-də qalmasının vacibliyini deyən Bleyr, xalqı “Brexit” tərəfdarları ilə mübarizəyə səsləyib. O, keçən il iyun ayında səsverməyə gedən xalqın, referendumda AB-dən çıxışla bağlı şərtləri bilməyərək səs verdiyini və insanların fikrini dəyişdirmək haqqı olduğunu deyib.
Bleyr, “Brexit” əleyhdarlarını bir araya gələrək, ayağa qalxmağa və birlikdən ayrılmaq üçün səs verənlərin fikirlərini dəyişdirməyə razı salmağa çağırıb.
Bleyrə görə, İngiltərə baş naziri Teresa May nəyin bahasına olursa olsun “Brexit”i həyata keçirməyə çalışır: "Xalq “Brexit”ə dair şərtləri bilmədən səs verdi. Bu şərtlər açıldıqca xalqın fikrini dəyişdirməsi onların hüquqlarıdır. Bizim vəzifəmiz də onları razı salmaqdır. Hökumətin siyasəti, nəyin bahasına olursa olsun, “Brexit”i həyata keçirməkdir. Küncə çəkilmək vaxtı deyil, ya da ümidsizlik vaxtı deyil. Artıq inandığımız şeyləri müdafiə etmək vaxtı gəldi".
İngiltərə xarici işlər naziri Boris Conson isə keçmiş baş nazirin açıqlamalarına sərt reaksiya verib. Conson Bleyrin “Brexit”ə “bəli” deyənləri təhqir etdiyini deyib: "Bleyr və xalqı “Brexit”ə qarşı ayağa qalxmağa çağıranlara hörmətlə demək istəyirəm ki, mən də xalqı ayağa qalxmağa və Bleyr həyasız kampaniyası üçün təkrar ekrana çıxanda televizoru bağlamağa çağırıram".
Qeyd edək ki, İngiltərə, Şotlandiya, Uels və Şimali İrlandiyadan ibarət Birləşmiş Krallıqda keçən il 23 iyunda keçirilən AB referendumunda xalqın 52 faizi “Brexit”i dəstəkləmişdi. Ölkənin 2 il ərzində AB-dən ayrılması nəzərdə tutulur.
Onu da xatırladaq ki, 63 yaşlı Toni Bleyr 1997-2007-ci illərdə İngiltərədə baş nazir vəzifəsini tutub.
