ABŞ Prezidenti Donald Trampın göz dikdiyi Danimarkanın muxtar bölgəsi olan Qrenlandiyanın potensial satınalmasının təxminən 700 milyard dollara başa gələ biləcəyi iddia edilir. Bu məbləğin ABŞ-ın illik müdafiə büdcəsinin yarısından çoxunu keçdiyi deyilir.
“NBC News”a anonimlik şərti ilə danışan üç mənbə, Trampın Venesuelaya hərbi müdaxiləsindən sonra ölkəsinin "milli təhlükəsizliyi" səbəbindən ələ keçirmək istədiyi Qrenlandiyanın dəyərini araşdırıb.
Vaşinqtonun potensial "Qrenlandiyanı almaq cəhdi" üçün 700 milyard dollara qədər pul ödəməli ola biləcəyini irəli sürən mənbələr, bu təxmini məbləğin akademiklər və keçmiş ABŞ rəsmiləri tərəfindən tərtib edildiyini bildiriblər.
ABŞ-lı bir mənbə iki ölkə arasında mövcud razılaşmaya əsasən, ABŞ-ın Qrenlandiyaya daha çox qoşun göndərə və hərbi və təhlükəsizlik imkanlarını genişləndirə biləcəyini irəli sürüb.
Tramp iddia edir ki, əgər Qrenlandiyanı onlar almasa, Rusiya və ya Çin alacaq: “Mən prezident olduğum müddətcə bu baş verməyəcək. Hərbi mövcudluq kifayət deyil. Mülkiyyətə sahib olmalısınız".
Qrenlandiya ətrafında Çin və Rusiya sualtı qayıqlarının və digər hərbi gəmilərin mövcudluğunu qeyd edən Tramp, buna icazə verməyəcəklərini və "Qrenlandiyanı bu və ya digər şəkildə alacaqlarını" bildirib. Qrenlandiyanı ələ keçirmək istəklərinin NATO ölkələrinin birliyinə mənfi təsir edib-etməyəcəyi sualına isə Tramp, "Onların bizə ehtiyacımız olduğundan daha çox ehtiyacı var" cavabını verib.
Qrenlandiyanın Baş naziri Nilsen isə Qrenlandiyanın Danimarka Krallığının bir hissəsi olduğunu və satılmadığını bildirib.
Danimarka konstitusiyalı monarxiyadır. Ərazisinə Danimarka və iki muxtar bölgə - Qrenlandiya və Farer adaları daxildir. NATO-nun qurucu üzvü olan ölkə, 1973-cü ildən bəri Avropa Birliyinin üzvüdür.
Qlobal istiləşmə səbəbindən əriyən buzlaqların açdığı dəniz yolları, Süveyş və Panama kanalları kimi ənənəvi dəniz yollarına alternativ kimi ortaya çıxır. Bu vəziyyət isə, ABŞ başda olmaqla Rusiya və Çin kimi bir çox ölkənin bölgəyə marağını artırır.
TAHİR
